Nunat Avannarliit aanngajaarniutit pillugit Nuummi isumasioqatigiittut
Nunat Avannarliit aangajaarniutit pillugit ulluni makkunani Nuummi isumasioqatigiipput, tassungalu Nunatsinnit Nunat Avannarlerniillu immikkut qaaqqusat 45-t peqataapput, matumanilu imigassamut ikiaroornartumullu tunngatillugu pitsaaliuinermi misilittakkanik paarlaaseqatigiinniarlutik, iliuuserisanik periutsinillu oqaluuserinninniarlutik.
- Aanngajaarniutinut tunngatillugu pitsaaliuineq nunatsinni peqqissuunissap siuarsarnissaanut, inuunerissuunissamut inuunerullu naleqassusaanut iliuuseqarnissami pingaaruteqarluinnartuuvoq, Peqqissutsimut Naalakkersuisoq, Martha Abelsen oqarpoq.
- Nunani Avannarlerni aanngajaarniutit pillugit isumasioqatigiinneq, imigassamik hashimillu ajornartorsiutitalimmik atuinermik pitsaaliuinermut tunngatillugu siunersioqatigiinnissamut pingaarutilimmut periarfissiivoq, Peqqissutsimut, Isumaginninnermut Inatsisinillu Atuutitsinermut Naalakkersuisoq Martha Abelsen isumasioqatigiinnermut marlunngornermi tikilluaqqusisoq taama erseqqissaavoq.
Ilisimasat nutaanerit sammineqassasut
Nunat Avannarliit aanngajaarniutit pillugit isumasioqatigiinneranni, aanngajaarniutit pillugit ilisimatusarnermi paasisanik ilisimasanik nutaanerpaanik tunngaveqartunik saqqummiussisoqassaaq.
Sammisassat tassaapput: Imigassap pissarsiariuminarneranut tunngatillugu aaqqissuussamik iliuuserisat, imigassartoriaatsit, utoqqaat imigassarlu, cannabis peqqinnerlu.
Innuttaasut aanngajaarniutinik atuinerat pillugu nunatsinni misissuinerit nutaat saqqummiunneqassapput, taamatuttaaq Nunanit Avannarlernit peqataasut Kofoeds skolimut Kommuneqarfik Sermersuumilu Allorfimmut paasisassarsiorfiginissaannut aaqqissuussisoqassaaq.
Nunani Avannarlerni aanngajaarniutit pillugit isumasioqatigiittarneq 1984-imiilli ukiut tamaasa ingerlanneqartarpoq.
Qaaqqusisuuneq Nunat Avannarliit akornanni nikittaanneqarpoq, Paarisalu ukioq manna isumasioqatigiinnermut Nuummi Hotel Hans Egedemi ingerlanneqartussamut qaaqqusisuuvoq.