Nunat Atlantikup Avannaamiut ulluat ingerlanneqarpoq
- Aap, panaattut assorsuaq sakkortorpalupput, vikingit illoqarfeeraanni, Takornarnianut Københavnimi sapaatip akunnerata uuma naanerani ulloqartitsimmata, imali ajortiginngilaq vikingit naggataagut mamareqisaminnik mjødimik immiaarartuutigalutik illarrattorsuullutik. Illu Atlantiku ippassaq ullumilu inunnik qammivippoq, umimmaap neqaanik kalaallit pisiniarfiutaanni pisiamik kebabituullutik, savalimmiormiut aalisariutaat umiarsualiviimmpput, islandimiut oqaluttuaat tusarnaarneqarsinnaallutik, minnerunngitsumillu erinarsoqatigiit Aavaat quersuatoqarsuarmi aliikkusersuillutik.
- Nunani Atlantikup Avannaamiut Takornarniartitsivii ukiup aappassaa taama aaqqissuusseqatigiipput, Nunat Atlantikup Avannaaniittut takornarnianut pilerinarsarniarlugit. Nunatsinni Takornariaqarnermi Inuussutissarsiornermilu Siunnersuisoqatigiinni tuniniaanermut siunnersorti, Nini Biilmann ima oqarpoq:
- Pingaartumik maanna aningaasarsiornikkut ajornartorsiortoqarnerata nalaani immitsinnut nittarsaattariaqarpugut, tamassi maannarnissassinnut tikilluaqqusaavusi.
- Inuit Jyllandimiit Fynimiillu takkussuupput, Kalaallit Nunaanniit, Savalimmiuniit Islandimiillu misigisaqarusullutik.
Kikkulliuku takkussuuttut?
- Tassaanerupput inuit nunat pineqartut arlaanniissimasut, aamma nunanut taakkununnga takornarniarlutik angalarusuttut, imaappoq inuit alapernaatsut, Nunatsinni Takornariaqarnermi Inuussutissarsiornermilu Siunnersuisoqatigiinni tuniniaanermut siunnersorti, Nini Biilmann, oqarpoq.
