Nunat amerlanerit Danmarkip peqataatikkusuppai

- Nunat Qalasersuarmik kaajallaasimasut arfineq-pingasut Nunat Issittut Siunnersuisoqatigiivini nunarsuup sinneraneersunik inissaliisariaqarput, nunat issittut tikinnissaasa ajornannginnerulernerat pissutigalugu siunnersuisoqatigiit taakkua qanoq aqunneqassasut aalajangiippata, Canadami Danmarkip aallartitaa Erik Lorentzen Canadian Pressimit apeqqarissaarfigineqarluni taama oqarpoq.

Nunat amerlanerujartuinnartut peqataarusulerput, ilaatigullu Kina, Italia Argentinalu alaatsinaatsuunissaminnut peqataajumallutik.

Erik Lorentzen isumaqarpoq nunat allat alaatsinaattutut peqataatinnissaat qularnanngitsumik periaasissaasoq pitsaanerpaaq, Nunat Issittut Siunnersuisoqatigiivisa patajaatsumik sunniuteqarnertik ingerlateqqissappassuk.

- Kissaatigaarput Nunat Issittut Siunnersuisoqatigiivi siunnersuisoqatigiiujuassasut nukittuut aammalu kissaatigaarput nunani issittuni apeqqutit ajornartorsiutillu oqaluuserineqarnissaat isumaqatigiissutigissagipput. Tamatumanimi imaanngilaq nunat issittuunngitsut aalajangeeqataasassasut, Erik Lorentzen oqarpoq.

Hansip Qeqertaa pillugu isumaqatigiinnginneq immaqa erniinnaq qaangiutissasoq, Lorentzenip taatsiarpaa, tassami naalagaaffiit akornanni oqallinnerit aallartittussanngormata.

Aallartitarlu naggasiilluni ima oqarpoq:

- Immitsinnut sorsuutinngilagut, neriniartarfiliaqatigiiginnartarpugut.