Nunat allamiut taasitissaariaraluarpaat

Inuit Nunani Avannarlerni innutaassuseqanngitsut kommuninut taasisinnaatitaanerat Naalakkersuisut inatsisissatut siunnersuusiornermikkut arsaarinnissutiginiaraluarpaat. Suliniutimmi angisuut piviusunngoralerpata nunani allamiut taakkunani sulisut kommunalbestyrelseni amerlanerussuteqalersinnaanerat, Naalakkersuisut aarleqqutigaat. Inatsisartulli Inatsisinut Ataatsimiititaliaat taama aarleritiginngillat.
Allattoq Jens Thorin
novembarip 27-at 2012 16:20

Kinaluunniit Naalagaaffeqatigiinni innuttaassuseqanngikkaluartoq, naalagaaffeqatigiinni ukiuni ikinnerpaamik pingasuni najugaqarsimasoq, Nunatsinnilu qaammatini arfinilinni qinersinissaq sioqqullugu aalajagersimasumik najugaqarsimasoq, kommunalbestyrelsenut qinersisinerni sassarnissamut qinersinissamullu pisinnaatitaavoq.

Naalakkersuisut siunnersuutigaat, Nunani avannarlerni innutaassuseqanngitsut kommunalbestyrelsinut qinersisinnaatitaanngisaannassasut. Tassa svenskiuguit Nunatsinnilu najugaqarlutik qinersisinnaavutit qinigassanngortissinnaallutillu, kisianni assersuutigalugu franskiuguit, amerikamiuuguit imaluunniit Kinamiuuguit ajornassooq, qanoq sivisutigisumilluunniit Nunatsinniissimagaluaruit.

Takorlooriarummi Nunarput Kinamiunit tuusintilikkaanit nutserfigineqarpat, taakkualu tamarsuarmik qinigassanngortitaminnik qinersippata.

Taamaammat siunertaavoq, "sulisut nunani allaneersut amerlasoorsuullutik Nunatsinnut tikeralissappata, nunatsinni najugaqartut ikinnerussuteqalinnginnissaat. Assersuutigalugu Nuup eqqaani saviminissamik piaasoqalernerani, Maniitsup eqqaani aluminiuliorfiliortoqarpat avannaaniluunniit uuliasiortoqalrpat, soorlu Naalakkersuisut allattut.

Inatsisartulli inatsisinut ataatsimiititaliaat taamannak eqqarsarneq pasisinnaanngilaa.

Naalakkersuisummi oqareerput isumaasoq, nunani allamiut ataasiakkaat suliniutit angisuut sanaartorneqarneranni maaniittassasut qaammatit arfinillit aqqaneq marlullu akornanni sivisussuseqartumi, sanaartornerlu tamakkerluni ukiuni marlunniit tallimat tikillugit sivisussuseqartassalluni.

Tassalu malittarisassat massakkut atuttut taamaatsillugit kommunini qinersinernut peqataasinaanngoreerput.

Nunanilu allamiut, suliniutit angisuut tunisassiorfigineqalernerani suliinnartussat, Nunatta inui siooralersissinnaanngilaat. Alcoap suliniutaa Isukasianilu suliniut pillugit Naalakkersuisut paasissutissaataat aallaavigalugit, Inatsisinut ataatsimiititaliaat naatsorsuereerlutik taama inerniliipput.

- Ingerlaatsinerup nalaani Nuummi Maniitsumilu sulisut pingajorarterutaat kalaallinik inuttalerneqarpata, pilersaarutini marluusuni avataanit suliartortut inuit 1.100-ut missaannik taamaallaat amerlassuseqassapput. Tamanna Kommuneqarfik Sermersuumi qinersisinnaasunut 16.000-it missaannik amerlassusilinnut Qeqqatalu kommuniani qinersisinnaasunut 7.000-it missaanni amerlassusilinnut naleqqiullugu isigineqassaaq, inatsisinut ataatsimiititaliaq isumaliutissiissummini taama allappoq.

Inatsisinut ataatsimiititaliap isumaqatigiittup allannguutissatut siunnersuutigaa, qinersinissamut pisinnaatitaaffiit ullumikkut atuuttut allanngortinneqassanngitsut. Siunnersuut Inatsisartut pingajussaaaneerlugu ualimut suliaraat.