Nunasisut qitorniorpiarunnaartut
Danskit arnartaat agguaqatigiissillugu marluk inulaarlugit qitornisarput, nunasisullu arnartaat agguaqatigiisillugu marluk sinnilaarlugit qitornartaartarlutik. Aviisimi Politikenimi taama allaaserinnittoqarpoq.
Nunasisut arnartaat danskit arnartaannut naleqqiullugit ukiut 15-iinnaat matuma siornagut marloriaammik qitorniornerusimagaluarput.
Kisitsisit saqqummiunneqartut qimerlooreerlugillu nunasisut siornatigut ilaqutariippassuanngortarneri pillugit danskit ingussisarnerat maanna taamaasilluni pissutissaaruttoq Danmarkimi naatsorsueqqisaartarfimmi atorfillip Anna Qvistip oqaatigaa.
- Nunasisut danskinut akulerukkiartorneri, danskillu assigiinneruleriartorneri, taamaasilluni tigussaasunngoriartorpoq. Inuit ikinnerussuteqartut amerlanerussuteqartut inooriaasaanit sunnerneqariartorneqartarnerat nalinginnaasuuvoq, Anna Qvist oqarpoq.
Maani nunatsinni arnartavut agguaqatigiisillugu marluk sinnilaarlugit qitornisarput.