Nunasisut qinnuteqaqqissinnaalerput

Meeqqat, inuusuttut inersimasullu 500-t tungaanut amerlassusillit, palistsiinamiunillu sumiluunniit innuttaassuseqanngitsunit angajoqqaallit, Danmarkimi nunasinissaminnut qinnuteqarnerat pillugu, paasissaanngitsumik kukkusoqarsimanerarlugu, maanna danskit nunasisunut ministeriata, Birthe Rønn Hornbeckip tamatuma aaqqinneqarnissaa allakkatigut nalunaarutigaa.

Allakkami aamma atuarneqarsinnaavoq nunasisut maanna qinnuteqarsinnaalersut, aviisi Politiken allappoq.

- Taakku qinnuteqarnissaat kaammattuutigaarput, peqqussutaasullu malinneqarsimappata akuerineqarnissartik naatsorsuutigisinnaavaat, Birthe Rønn Hornbeck oqarpoq.

Inuusuttut 21-nik ukioqalereersimasut, inatsit atuuttoq malillugu nunasinissaminnut akuerisaanissaat qularnaraluartoq, taamaattoq taakku amma periarfissinneqarput nunasinissaminnut qinnuteqarnissaannik. Taamaaliortoqarpoq nunasinermi ministereqarfimmit, ukiorpassuarni kukkusumik sullinneqarsimanertik tunngavigalugu, aammalu 21-nik ukioqalinnginnerminni qinnuteqartarsimagaluarneri pissutigalugit.

Naalagaaffiit Peqatigiit isumaqatigiissutaanni, immikkuullarissuusut marluusut malillugit, nunasinissaminnut qinnuteqareernermi ingerlaannaq qinnuteqaataat suliarineqartartussaagaluarpoq, taamaattorli ukiuni qulini utaqqisimallutik. Tassulu maanna Birthe Rønn Hornbeckip nunasinissaminnut qinnuteqartut siunissaat qulakkeerunarpaa.

- Kukkuneq taamaattoq paasiuminaappoq. Kukkunermillu eqqorneqarsimasut tamarmik maanna pissussaaffik eqqortoq malillugu sullinneqarnissaat qulakkeerneqarpoq, Birthe Rønn Hornbeck erseqqissaavoq.

Tamassumali oqaluuserineqarnera tamaannga killeqarunanngilaq. "Kukkunermik paasineqarsinnaanngitsumik" oqarneq paasiniarneqassasoq Folketingimi ilaasortat arlallit kissaatigaat.