Nunasisut akuunerulersinnissaannut qinersinissamut qineqqusaarput

Nunasisut akuunerulersinniarlugit Københavnimi siunnersuisooqatigiinnut qineqqusaarneq, kalaallit pingasut aamma qigigassanngortiffigisaat qinersisartunik ataatsimiisitsinermik Amagerimi ippassaq aallartinneqarpoq. Qinersisartunik ataatsimiisitsinermi 13-iinnaat peqataapput, qineqqusaartut taakkunannga peqataasunit qulingiluaallutik, kalaallit marluk. Qineqqusaartut katillutik 48-pput qinigassanngortitsivinni tallimani agguataarsimallutik, taakkunannga 48-nit kalaallit oqareernitsitut pingasuupput, taakku isaasalerlugu ”akuleriiaat allattorsimaffiini” ilaapput. Nunasisut akuunerulersinniarlugit siunnersuisooqatigiinnut ilaasortassat 15-it qinerneqartussaapput. Qinersineq marlunngornermi marsip ulluisa arfineq-aappaanni ingerlanneqassaaq.

Taasisinnaasut 18-ileereersimassapput, Københavnimi aalajangersimasumik najujaqartuullutik, danskisut tunuliaqutaqassanngillat nunat Killiit avataaneersuussapput kalaaliullutilluunniit. Kalaallit qinigassanngortissinnaanerat nutaajuvoq.

Qinersisinnaasut Københavnip Kommunea naapertorlugu 55.000-it missaanniipput. Apeqqutaalerporli qinersisinnaasunit taakkunannga qassit marsip ulluisa arfineq-aappaanni taasiartussanersut. Kalaallit qinigassanngortittut ilaata, Nikoline Ziemerip, qinersiartortukinnissaa ippassaq ernummatiginerarpaa, oqarluni, qinersisartut 10 procentiinnaat taasiartussappata, qinersisinnaasut 55.000-iunerat iluaqutaanavianngitsoq.