Nunasiaateqarsimaneq qulaajaqquaa

Annika Smith, Savalimmiormiu affarmik qallunaajusoq Københavnimi SF sinnerlugu Folketingemut qinigassanngortittoq isumaqarpoq, Ilumoortussaq pillugu Isumalioqatigiissitamik, Danmarkip Kalaallit Nunaatalu akornanni nunasiaateqarnikkut pissutsinik qulaajaasussanik pilersitsisoqartariaqartoq.
maajip 27-at 2011 13:41

Taanna isumaqarpoq siunnersuut siornatigut saqqummiunneqareernikuugaluartoq, aatsaat taama soqutiginartigilersoq, siunissami Issittoq pillugu pissaaneqarniunnermi Danmarkip Kalallit Nunaatalu ataatsimoorlutik siuttutut saqqummernerat pissutigalugu.

SF sinnerlugu qinigassanngortittup aviisimut ullormut saqqummersartumut Politikenimut allakkamini oqaatigaa, Lars Løkke Rasmussenip naalakkersuisui Ilumoortussaq pillugu Siunnersuisoqatigiinnik pilersitsinissaq pillugu suliniuteqarnavianngitsut.

- Naalakkersuisulli nutaat taamaaliortariaqaraluarput, Annika Smith aamma oqarpoq.

Tassani innersuussutigaa, illersornissamut ministeriusimasup Søren Gadep 2009-mili 1968-imi Pituffiup eqqaani timmisartup qaartartorsuarnik usisup nakkarneranut atatillugu kalaallit pilliutigineqartutut misigisimasutut pasillersimammagit.

Wikilieaks-imi saqqummiunneqartut nutaat takutiinnanngilat, pingaakujunniartumik illersornissamut ministereqarsimasugut.

Oqaluttuarisaanermi kanngunartuliat soorlu meeqqanik arsaarinnittarnerit, meeqqat inatsisitigut angajoqqaaqanngitsut kiisalu suliat allat nunasiaataagallarnerup nalaani pisartut, qulaajarnissaannut Danmarkimi naalakkersuisut sapiissuseqarsimannginnerat aammattaaq tikkuarneqarpoq.

- Taamaattuminguna Ilumoortussaq pillugu Isumalioqatigiissitamik pilersitsisariaqartugut suna tamaat qulaarlugu iluarsiniassagutsigu, Annika Smith SF-meersoq oqarpoq.