Nunasiaateqarneq eqqumiitsuliorneq aqqutigalugu tammatsaaliorneqalerpoq

Nunatsinni nunasiaateqarneq ilisimaneqarluaraluartoq nunani avannarlerni tamani ilisimaneqanngilaq. Tappavani nunasiaateqarsimanerup puigorneqarnissaa immaqa kissaatigineqartarpoq. Nunalli Avannarliit Siunnersuisooqatigiivisa eqqumiitsuliorneq pillugu suleqatigiissitaanni tamanna puigutsaalineqarpoq.

Nunani avannarlerni nunasiaateqarneq pillugu saqqummersinneqartut nunatta katersugaasiviani ullumi saqqummersinneqarput.

Saqqummersitsineq ”Rethinking Nordic Colo-nialism”-imik taaguteqartinneqarpoq. Tassanilu assit, qiortakkanik assilialiat, video-t, filmillu saqqummersinneqarput.

Nunasiaateqarnermi misilittakkat aamma oqallisigineqassapput. Nunani avannarlerni, Brasiliami, Caribiami, Afrika Kujallermi, USA-milu eqqumiitsuliortut suliaat saqqummersinneqassapput.

Saqqummersitsinermi aaqqissuisut ilaata Tone Olaf Nielsenip nunasiaateqarneq pillugu saqqummersitsineq ima oqaluttuaraa:

-Immikkut ilisimasaqarfiginnginatsigu inuppassuarnik Ilinniarfissuarmi saqqummersitsinissamut tusarniaanermullu peqataasussanik sapaatip akunnerata naanerani qaaqqusivugut.

Aviaja Egede Lynge, filmiliortartoq Randi Broberg, Laila Hansenilu nunatsinnit peqataassapput.

Suliniaqatigiiffik Inuit Youth Internationalimit Ivaaq Poulsen peqataatinneqassaaq.

Inuit Youth Internationalip Nuummi inuusuttut nittarsaassiffiginikuuvai. Tammanalu videonngorlugu tusarnaagassianngorlugulu immiunneqarneqareerpoq.