Nunasiaataanermi pisut kiisalu misiliut pillugu misissuisoqarli
- Ajuusaarnarpoq, taamanikkut 1951-imi pisimasut, ilaatigut meeqqanut kinaassusiijaanernik kinguneqartut, tamakkua tassa pisarsimapput aamma taannaannaanngilaq 1951-imi pisoq. Inuiaqatigiinuku nalilersorniagassaat, qangaaniilli ajornartorsiutit taakkuupput nunasiaasimasut aamma nunasiaqartut akornanni annertunerusumik oqallisissat.
Misiliut 1951-mi pisoq pillugu Aqqaluk Lynge taama oqarpoq. Meeqqat 22-t taamani immikkut toqqarneqarput Kalaallit Nunaanni atuarfeqarnerani qallunaanngorsarneqartumi siuttussatut piukkunneqarlutik. Taakku angajoqqaavinit arsaarinnissutigineqarlutik Danmarkimut aallartinneqarput, kingornalu Nuummut meeqqat angerlarsimaffiannut inissinneqarlutik. Meeqqallu ilaat Danmarkimi meerarsiartaarineqarput.
Pisut pillugit naalagaaffimmit nassuiaasoqanngisaannarpoq, misiliutigineqartulli ilaqutaasalu pisortanit nassuiaasoqarnissaa kiisalu qallunaat oqartussaasuisa pisortatigoortumik utoqqatsernissaat piumasaraat. Tamannalu Inuit issittormiut siunnersuisoqatigiivini Kalaallit Nunaanni siulittaasumit isumaqatigineqarpoq, utoqqatsernerli kisimi tunniunneqassanngilaq, utoqqatsertoqassappat pisumut attuumassutillit taasiivigineqarnissaat kiisalu eqqartuussivilersuussisoqarnsisaa Aqqluk Lyngep piumasaraa. Taamaattoq inuiattut pisut eqqartortariaqarigut oqarpoq.
-Nunatsinni nunasiaataanerup nalaani pisartut annertunermik erseqqinnerusumillu paasiniaaffigineqartuuppata oqallisigineqarlutillu, taava suna eqqortuunersoq, qanoq pisimanersut tunuliaqutaallu paasiniarlugit ataatsimut inuiaqatigiinit oqaluuserineqarsinnaassagaluarpoq. Nunasiaataanerup nalaani pisimasut qanoq iliussanerigut nunatsinni annertunerusumik oqaluuserineqanngillat, assullu iluatsinnarpoq ilaatigut una filmiliaq, Tine Bryldip atuakkiaanik toqqammaveqartoq, oqallinneq annertunerusoq pilersuuppat, Aqqaluk Lynge oqarpoq.
