Nunasiaanerput pillugu quiasaarusiaq Nunatta Isiginnaartitsisarfiata takutileraa
Nunasiaataanitta nalaani pisarsimasut iloqissiortilaarlugit takuteqqaarneqassasoq, Nunatta Isiginnaartitsisarfiata tusagassiuutinut nalunaarummi allaaseraa:
"Jeppe på bjerget", atuakkiortup Ludvig Holbergip quianartuliaralugu 1722-mi allassimasaa aallaavigalugu isiginnaagassiaavoq.
Isiginnaagassiallu imaa ulloq manna tikillugu atorneqarsinnaajuarpoq, Nunattalu Isiginnaartitsisarfiata Nunatsinni pisutut maanna isiginnaagassiarisimavaa.
Baroni akimasoq nunatsinni niuertarfimmi tamatumuuna naalagaavoq, Jappalu kalaaliusoq ikkatigalugu paatsiveerussarlugu.
- Isiginnaartitsisarfiup piffissanngorsoraa nunasiaataasimanerput qiviaqqilaassagipput, aamma quujanarsinnaasut eqqumiitsullu oqaluttuaralugit, Nunatta Isiginnaartitsisarfia tusagassiuutinut nalunaarummi taama ilaatigut allaaserisaqarpoq.
Nunatta Isiginnaartitsisarfiani siornatigut pisortaasimasup Svenn B. Syrinip "Jeppe på bjerget" nunasiaataanitta nalaani pisimasuusaartunngorlugu naleqqussarsimavaa.
Jappa inuiaqatigiinni nakkaassimasuuvoq, nulia allasiorajuppoq, niuertoqarfimmilu naalagaasut Jappa sorpajuttut isigivaat. Jappap ajornartorsiuteqarnini aalakoornermut saatsittuarpaa. Niuertoqarfimmi naalagaasup ikiortini ilagalugit Jappa uukapaatikkusuppaa. Qaatusimanani aalakoortoq naalagaasup siniffianut innartippaat, iteruni qanoq iliussanersoq takuniarlugu.
Jappa iterami toqusimasorivoq qilammullu apuussimasoraluni.
Quiasaarusiaq "Jappa" Nunatta Isiginnaartitsisarfiata tallimanngornermi oktobarip ulluisa 21-anni takuteqqaassavaat, sinerissamullu kingorna angallanneqassalluni. Illoqarfiit tikinneqartussat tassaapput Qaqortoq, Sisimiut, Aasiaat, Qasigiannguit, Ilulissat Upernavillu.
