Nunarsuup kissakkiartornerata kigaallatsinnissaanut aaqqiissutaasinnaasoq aajuna
Amerikamiut ilisimatuut nuimasut arlallit taamaaliortoqarsinnaanasoraat. Iluatsinneqarsinnaassappallu, silaannaap kissakkiartornera kigaallatsinneqanngikkuni immaqa univissussanerpa?
Ilisimatuussuutsikkut misissuinerit marluk suliatigut atuagassiani ataqqisaalluartuni Nature Climatye Changemi aamma Environmental Research Lettersimi saqqummersinneqaqqammerput.
Misissuinerni taakkunani marlunni CO2-mik silaannarmut aniatitsinerup annikillisarneqarsinnaaneranut periarfissaq tikkuartorneqarpoq. Ilisimatuut nalunaarusianik marluusunik suliarinnittuusut isumaqarput sananeqaateeqqanik qinngornernik utertitsisinnaasunik silaannarmut siaruarterinikkut seqerngup kissakkiartortitsilluni sunniutaa annikillisarneqarsinnaasoq. Kiassuseq taamaalilluni appariartulissaaq sermillu aakkiartornera kigaallissalluni.
Jetmaskiina anginngitsoq atorlugu sananeqaateeqqanik siammarterisoqarsinnaavoq.
Nunarsuup kissakkiartorneranut aaqqiissutissaavoq immikkorluinnaq ittoq, assigiinngitsupilussuarnillu isumaqarfigineqarpoq.
Keith Allott World Wildlife Fund sinnerlugu silaannaap allangoriartornerata ilisimatusarfigineqarneranik aqutsisuusoq isumaqarpoq pinngortitap taamatut iliuuseqarfigineqannginnerani suli annerusumik ilisimatusarfigineqarnissaa pisariaqartoq.