Nunarsuup illuanut nunarput pillugu isumassarsiorput

Danmarkimi illersornissamut ministeri Nick Hækkerup Kalaallit Nunaata Savalimmiullu imartaani alapernaarsuisarnerit ajunnginnerusumik ingerlanneqarsinnaanerinik isumassarsiorluni, Australia-mi New Zealand-imilu ulluni makkunani angalavoq.
Allattoq Jaaku Lyberth
decembarip 16-at 2012 13:27

Australiap New Zealand-illu avataani imartat nunatta avataani imartat assigalugit annertoorujussuupput.

- Uagut nammineq qanoq iliorsinnaanissatsinnik nassaassarsiorata, Australiami New Zealand-imilu qanoq iliorlutik alapernaarsuisarnerminnik ingerlatsisarnersut paasiniarlugu nunanut taakkununnga angalavugut, Nick Hækkerup oqarpoq.

Nunat taakkua marluk imaani alapersuinermik ukiorpassuani misilittagaqarput isumannaatsumillu isumaginnittuusut, Hækkerup isumaqarpoq.

Australia-mi New Zealand-imilu alapernaarsuisartut suliassanik ulikkaarput, taakkununnga ilaallutik aalisarnermik avatangiisinillu nakkutilliinerit, anngiortumik eqqusseriarnerit nakkutigineqarnissaat, imaani ujajaasunik aamma angallatinik qimaasunik ilaasulinnik nakkutiginninnerit suliaannut ilaapput, taamatullu umiarsuarnik ajunaalersunik annaassiniarnerit suliaannut ilaapput kiisalu silaannakkut imaatigullu killeqarfiit nakkutigineqartarlutik.

New Zealand-imi imaatigut nakkutiliinneq ataqatigiissarniarlugu qitiusumik nakkutilliisoqarfeqarpoq, tassani ilanngaaserisut politiit aalisarnermik avatangiisinullu oqatussaasut aqutsiviat suliallu tulleriiarneqarnerat suliarineqartarput, sulianut ilaallutik sakkutuut imarsiortut timmisartortartullu oqartussaasui.

New Zealand-imiut nakkutilleeriaasiat maani periarfissaavoq, Nick Hækkerup oqarpoq.

Australiami New Zealand-imilu  alapernaarsuinerit qaammataasat atorlugit aamma ingerlanneqarpoq. Danmarkip qaammataasat atorlugit alaparnaarsuisalernissaa ilimagineqarpoq.

Australia aamma New Zealand timmisartuaqqanik ungasianiit aquttakkanik atuilerniarlutik eqqarsaateqarput.

- Uagut aamma taakkuninnga atuilernissatsinnik eqqarsateqarpugut. Timmisartuaqqat ungasianiit aquttakkat  isorartoorujussuarmi alapernaarsuisinnaanertik iluaqutigaat taakkualu ingerlanneqarnerat akikitsunnguulluni Nick Hækkerup oqarpoq.