Nunarsuup avannaani seqinermut illersortariaqarpugut
Qalasersuup nalaaniittoq seqernup qinngornerinut ulorianartunut illersuut ozoni, ukiuunerani issinnerujussuata kinguneranik aatsaat taama saaliortigaaq. Taamaattumik ilisimatuut nunani tamaneersut, Issittumi aammattaarli Danmarkimi Skandinaviamilu nunani allani seqinermit uuararnissaq mianersoqqussutigaat.
Danskit maannakkut upernariartornera seqineqarluarneralu malugisinnaallualereerpaat kisiannili seqinertaritipallaarnissaq mianersuutigisariaqarlugu, tassami ukioq manna ozonlagi qalasersuup avannarliup qulaaniittoq kiisalu Siberiap avannarpasissortaaniittoq Kalaallit Nunaatalu eqqaata ilaaniittoq ukiuunerani tappavanersuaq isserujussuarnerata kingunerisaanik saaliorsimaqimmat, silasiortut nalunaaruteqarpoq.
Uuttortaanerit takutippaat ozonlagip 40 procentia stratosfærimiittoq suujunnaarsinneqarsimammat naak siornatigut 30 procentiinnaasaraluarluni.
Ozonlagi saalioraangat qinngornerit ulorianartut ultravioletinik taaneqartartut silaannaap illersuutaasigut nunarsuarmut annguttarput, ammikkut kræfteqalernissamut qaninnerulersitsisarlutik. Tamanna Kalaallit Nunaanni ajornartorsiutaareerpoq kisiannili issittup silaannaa piffissap ilaani sivikinnerusumi kujammut ilaani ingerlaartarpoq taamaalillunilu Amerika Avannarlerup Qiterliullu nalaaniittoq ozoni aamma saaliorsinnaalluni, ilisimatuut oqarput.
