Nunarsuatsinni suli piitsoqaqaaq
Tamanna Naalagaaffiit Peqatigiit nalunaarusiaanni nutaami atuarneqarsinnaavoq, taamaattorli sumiiffinni tamani pitsanngoriartoqarsimanngilaq. Soorlu Afrikami tamanna killormut sammivoq.
Taamaakkaluartoq nalunaarusiami kisitsisit nuannaarutigineqartariaqartut, Henrik Kastoft Naalagaaffinni Peqatigiinni ineriartortitsinermik suliaqartuusoq isumaqarpoq.
- Nutaarsiassaq nuanneqaaq, tassami inuit 400 miliuunit piitsutut naatsorsuunneqarnissamut killigititap ataani inissisimagaluartut, maanna taama inissisimajunnaarput. Tamannami ineriartornerup ajunngitsup tungaanut ingerlaneranut takussutissaavoq, taamatullu ingerlaannarutta 2015-imi anguniagarput angussavarput, Henrik Kastoft oqarpoq.
2015 tassaavoq nunarsuarmi piitsutut inuusut affaannanngortinneqarnissaannik nunat assigiinngitsut anguniagassamittut aalajangiussimasaat.
Naalagaaffiit Peqatigiit nalunaarusiaani oqaatigineqarpoq, nunani ineriartortuni meeqqat 90 procentii ullumikkut atuartinneqartartut, mæslingimik toqquteqartartut ikileriarujussuarsimasut aamma nunat ineriartortut akiitsuinik isumakkeerinninnerup kinguneranik nunat ineriartortut inuit atugaannut tunngasunik aningaasartuuteqarnerulersut. Taamaakkaluartoq nunani ineriartortuni arnat naartusut ukiumut miliuunit affaannik amerlassuseqartut naartunertik erninertilluunniit toqqutigisarpaat, meeqqallu sisamaagaangata sisamaat naammatsilluni nerisinneqarneq ajorpoq.
Aamma nunani ineriartortuni innuttaasut affaat, tassa inuit miliardit pingajuata affaanik amerlassuseqartut, imermik minguitsumik imissaqaratillu perusuersartarfeqanngillat. Nunallu piitsut innuttaasa pingajorarterutaat pissarliortut najugaanni najugaqarput.
Taamaakkaluartoq pitsanngoriaatit anguneqarsimasut nunarsuarmi tamarmi aningaasarsiornikkut ingerlanerliulernermit, nerisassat uuliallu akitsoraluttuinnarnerannit, aamma nunat ineriartortut tunisassiaasa akikilliartuinnarnerannit maangaannartinneqariaannaapput.
Tamatuma peqatigisaanik nunat pisuut ineriartornermut tapiissutigisartagaat ukiup aappassaa, ikilisinneqarput, naak nunat pisuut tapiissutimik amerlinissaat neriorsuutigigaluaraat.
Soorlu Afrikami ineriartorneq killup tungaanut ingerlavoq.
- Taamaattumik naalagaaffiit siuttui New Yorkimi qanittukkut ataatsimiilerpata Naalagaaffiit Peqatigiit pisortaata Bankimoonip ilungersortumik qinnuigisariaqassavai, Afrikamut tapiissutiminnik marloriaatingortitsinissaminnik neriorsuutiminnik piviusunngortitseqqullugit.
