Nunarsuatsinni qamutit annersaat kiisami iluarsaanneqartut
Qamutit Ilulissani mittarfiup illorsuata eqqaaniittut nalinginnaasuunngillat, nunarsuarmimi annersaapput, maannalu tassa iluarsartuunneqarnerat piareerpoq. Avannaata Kommunia Facebookimi quppernermini taama allappoq.
Kommunip Ilulissanilu pinerluuteqarsimasunut inissiisarfiup suleqatigiinnerisigut qamussuit iluarsartuunneqarput.
Atortussat Avannaata Kommuniata akilerpai, inissiisarfimmiittullu qamutit iluarsartuunnissaat isumagalugu.
Kommunilli allagarsiussaani oqaatigineqanngilaq qamussuit qimuttulerluni Ilulissat mittarfiata eqqaanukaanneqarsimanersut.
Qamutit meterit 21-t sinnilaarlugit takissuseqartut siornatigut angallatigineqarsimapput.
Qamutit 1750 kiilut missaannik oqimaassuseqartut qimminik 260-inik taamani qimuttoqarput, taamaalillutillu nunarsuarmi qamutit annersaattut rekorti anguneqarpoq.
