Nunarsuarmioqatigiit imminnut isigisarnerat misissuivigaat
Muuamaamik kitaani upperisallit ingasattajaartutut akaarinnissuseqanngitsutullu isigineqartarput, muuamaamik upperisallit ileqqorluttutut, namminissarsiortutut aningaasarnermillu nappaateqartutut kitaamiunit isigineqartarput.
Nunarsuarmioqatigiit qanoq imminnut isigisarnersut nunani 15-ini misissuisoqareersorlu paasineqarpoq.
Amerikamiut misissuisarfiat nunani 15-ini misissuisimavoq. Kitaamiut muuamaamillu upperisallit imminnut isiginerluttartut minnerunngitsumillu illuatungerisamik arnartaasa ajortumik pineqartarneri qissimigaarsimagaat misissuinermi paasineqarpoq.
USA-mi qaartartumeerisoqarmat septembarip aqqarnanni 2001-imi muuamaamik upperisallit Egyptenimiunit, Indonisiamiunit, Jordanimiunit Tyrkiamiunillu qaartartumeerisimanissaat ilimagineqanngitsoq misissuinermi paasisaneqartut ilaagaat.
Tysklandimiut Spaniamiullu apersorneqartut affaasa muuamaamik upperisallit isiginerluttorujussuugaat misissuinermi aamma paasineqarpoq.
- 2001-mi septembarip aqqarnata kingorna nunarsuarmioqatigiit imminnut isiginerluttarnerat sakkortuseqqippoq, Danmarkimi nunarsuarmioqatigiit pissusaannik ilisimatooq Ulla Holm taama isumaqarpoq, tamannalu ima itisilerpaa:
- Inuiaqatigiit ataatsimoorussaqarnissarput pillugu inuiaqatigiinnik allanik akeqqersortarpugut, ilisarnaativut immikkut ittut illersorniarlugit. Soorlu tamanna Sorsunnerup Nillertup nalaani erseqqissorujussuarmik misigisimavarput, Ulla Holm oqarpoq.
Inuiaqatigiillu sumiikkaluarunik illersorniarlutik taama akeqqersortarnerat takussaasarpoq. Muuamaamik upperisallit nunani suliffissuaqarfiusuni najugallit kitaamiunut akeqqersimaannginnerusartut misissuinermi paasineqartunut ilaavoq. Ulla Holmilu naapertorlugu, nunani taakkunani suliffissuaqarfiusuni inuiaqatigiit pissusaannik tamallu oqartussaaqataanerannik paasisimasaqarnerat, tamatumunnga pissutaasarpoq.
