Nunarsuarmioqatigiit 2010-mi issittumut maluginnilerput
Akerleriinneq ingalassimatinniarlugu issittuni suleqatigiinneq pingaaruteqalernikuuvoq, Amerikamiu atorfilik naalagaaffinnik allanik suleqateqarnermik suliaqartoq Radioavisimut oqarpoq.
Nunat immallu issittumiittut, nunarsuarmiunit 2010-mi maluginiarneqarluarput. Sullualuk umiarsuarnit aqqutigineqarsinnaalerpoq. Ruslandip Kinallu Ruslandip avannaatigut umiarsuarnik angalasinnaanissaq soqutigaat. Canadallu Sullualuk kisermaakkusuppaa; Ruslandillu Ruslandip avannaa kisermaakkusullugu. Nunallu allat, USA taakkununnga ilaalluni, isumaqarput imartat taakku nunat tamat imartarigaat.
Amerikamiut geologitut misissuinerisa Nunarsuarmi gassip nunap iluaneersup suli nassaarineqanngitsup 30 procentiata missaa uuliallu suli nassaarineqanngitsup 25 procentiata missaa, nunani issittuniittussatut ilimagaat. Tamakkulu ilaasa Kalaallit Nunaanniinnissaat ilimagineqarpoq.
Tamakku saniatigut nunani issittuni kuulteqarpoq, uraneqarpoq, sølveqarpoq, aligoqqeqarpoq allarpassuarnillu naleqarluartunik aatsitassaqarluni.
Kia immap naqqa pigineraa apeqquterujussuuvoq. Canada, USA, Rusland Danmarkillu immap naqqani nunap toqqaviisa sumut killeqarfeqarnerannik nunanilu issittuni killeqarfiit sumiittussaanerannik ilisimatusarnernik pimoorussipput. Uulia, gassi nunap iluaneersoq aatsitassallu koruuninik milliarderpassuarnik isertitsiffiusinnaasut, kikkunnit pigineqarnerinik paasisaqarusunneq tunngaveqarportaaq.
Killeqarfiit suli inissivinneqannginnerat akerleriinnernut allanut aamma sunniuteqarput, soorlu Tartupalummik akerleriinnermut, Ualerngullu imartaani USA-p aalisarneranut, aalisarfigisaat Canadap nammineq piginerarmassuk, Canadamimi aalisarneq suli isumalluutaammat pingaarutilik.
Allatut oqaatigalugu: Akerleriiffiusinnaasorpassuupput.
Taamaattumik nunat issittuniittut sakutuulersuulluni akerleriinnissaq ingalassimaniarlugu iliuuseqartariaqarput, Kenneth Yalowitz atorfilik USA-milu Dartmouth Collegemi nunat assigiinngitsut akornanni paasinninnermut immikkoortortami pisortaq radioaviisimut oqarpoq.
Akerleriinnerit tamarmik attaveqaqatigiilluarnikkut qaangerneqarsinnaasariaqarput, taamaattumillu pingaaruteqarpoq Issittumi siunnersuisoqatigiit aqqutigalugit attaveqaqatigiiffiillu allat aqqutigalugit nunat issituniittut suleqatigiinnertik nukittorsassagaat. Nunat immallu issittumiittut avannarliit ukiuni tullerni pingaarneruleraluttuinnassapput, atorfilik naliliivoq.
