Nunarsuarmik kaajallaaniartoq Nuummut tikilerpoq
Reykjavikkimiit Kalaallit Nunaata Illoqarfiisa pingaarnersaannut umiarsuarmik ilaaffissarsiulerpunga, Somen Debnath ukiuni arfineq marlunni nunarsuarmi cykelerluni angalaarsimasoq nassuiaavoq. Nunat 64-it tikereersimavai, maannakkullu Kalaallit Nunaat, nunat 65-issaattut anguniarlugu pimoorutilersimallugu. Qanoq ililluni qaqugulu pissanersoq naluaa.
- Taamaaliussaanga, siumoorlunga aningaasanik katersereerneq ajorpunga. Kisianni upperiinnarukku taava ajorunanngilaq. Aamma Kalaallit Nunaanut apuutissaanga, taanna qularerpalunnagu oqarpoq. Nuummi illoqarfiup aqquserngi 100 kilometeriusut kaajalukaarlugit cykelerfigissamaarpai.
- Cykelertut allat ingiaqatigerusussinnaassappannga nuannissaqaaq, Somen Debnath oqarpoq.
Kalaallit Nunaat pillugu ilisimasaqarpallaanngilaq isumaqarunarlunilu Kalaallit apummik illuikkianik najugaqartut. Isussarsiaanullu taanna ilaavoq.
- Maannakkorpiaq nunat naalagaaffiillu pillugit atuarpallaanngilanga, nammineq isinnik takorusunneruakka, Somen Debnath oqarpoq.
Angalaarnermi siunertaavoq HIV aamma AIDS pillugit nunarsuarmiunut paasisitsiniaanissaq. Taassuma assorsuaq tupaallaatigisimavaa Indiami nappaat qanoq paqumigineqartigisoq, kikkunnilluunniit oqaluuserineqarusunnani allaat. taamaattumik nunarsuaq kaajallallugu angalaarnermini, nunagisamini imaluunniit nappaat pillugu paasisitsiniaasarpoq.
Oqaluttuassarpassuaqarporlumi, ukiut arfineq marlut cykelernermini Somen Debnath ilaatigut Afganistanimi Talepaninit tigusaasimavoq, namminerli oqaluttuarnera naapertorlugu aniguisinnaasimavoq tigusarinnitsini Indiamiut nerisassassiaannik karrylinnik iggassimagamigit.
Somen Debnath angalaarnini piumassutsiminnik aningaasaliisut, tunissutillu aqqutigalugit piviusunngortittarpai , tupermi sinittarpoq imaluunniit inuit naapitani unnuiffigisarlugit. Aammalumi Kalaallit Nunaannut pissagaluaruni tassani najugaqartuniit unnuiffigisinnaasaminik neqeroorfigitereersimavoq.