Nunarsuarmi utoqqaanersaq 113-inik ukioqalerpoq

Nunarsuatsinni angut utoqqaanerpaaq ullumikkut 113-inik ukioqalerpoq! Septembarip 18-ianni 1895-imi Japanimiu Tomoji Tanabe inunngorpoq. Ullumikkullu suli ajunngitsorsuuvoq, taamalu nunarsuatsinni angutini utoqqaanerpaatut imminut taasinnaalluni.
septembarip 18-at 2008 13:55

Qanormitaavaana ililluni utoqqarsuanngoraluarluni inuunini ingerlatiinnarsinnaagaa?

Tomoji Tanabe oqarpoq, inuunerminut sivisuumut imigassartortannginninni pujortartannginninilu patsisaasut. Aamma nerisannaani mamarilluakkani, raajat qalunermi siatat, ingasaallugit nerissaarsimavai, orsoqarpallaaqimmatagooq.

- Pilluarlunga inuuvunga, aamma toqunissara kissaatiginngilara, Tomoji Tanabe siorna 112-inik ukioqalerami taama oqarpoq.

Tomoji Tanabe Japanimi illoqarfimmi Miyakonojo-mi najugaqarpoq, arfineq-pingasunik qitornaqarluni, 25-nik ernutaqarluni 54-inillu ernutaqqiuteqarluni.