Nunarsuarmi utoqqaanersaanerartoq USA-mi toquvoq
USA-mi naalagaaffimmi Montanami utooqqarnut paaqqinnittarfimmi, Walter Breuningip najugaqarfigisaani, sulisut oqarnerat naapertorlugu Walter Breuning ippassaq toquvoq. Breuning illoqarfiup aviisianit ukiut marluk matuma siorna apersorneqarnermini oqarpoq, nalinginnaalluinnartumik inuuneqarnini ukioqqortunerminut pissutaagunartoq.
Ukiuni kingullerni 35-ni ullormut marloriarluni taamaallat nerisarsimavoq.
- Unnukkut nerisarnani sungiukkaanni, inuunerinnartorujussuaq paasinarsisarpoq, aviisimut Great Falls Tribune-mut 2009-mi oqarpoq.
Breuning Minnesotami septembarip ulluisa 21-anni 1896-imi inunngorpoq.
Angutini suli peqqissuni nunarsuarmi utoqqaanersatut Guinness Rekordbogimi ukioq-manna saqqummersuni ilanngunneqarpoq. Maanna utoqqaanersanngorpoq japanimiu, Jiroemon Kimura, taanna marlunngorpat 114-iliissaaq.