Timi inuusuttunngulernermullu ikaarsaarneq atuarfinni atuartunut nukarlernut atuartitsissutigineqartalertariaqartut, Lene Stavnsgaard, kinguaassiuutinik ilinniartitsineq inuiaallu pillugit suliniaqatigiiffik Sex og Samfundimeersoq, isumaqarpoq.Assi: Siphiwe Sibeko/Reuters/Ritzau Scanpix

Nunarsuarmi tamarmi niviarsiaqqat inuusuttunngulernermut siusinaartumik ikaarsaatalersut

Niviarsiaqqat inuusuttunngulernermut siornatigornit siusinaartumik ikaarsaartalersimasut, danskit immikkut ilisimasallit nutaamik misissuinerisa takutippaat.

Nunarsuarmi tamarmi niviarsiaqqat inuusuttunngulernermut siusinaartumik ikaarsaartartut amerliartuinnarput.

Danskit immikkut ilisimasallit misissuinerisa tamanna takutippaa. Immikkut ilisimasallit nunanit allaneersut aamma misissueqataasimapput.

Nunarsuarmi niviarsiaqqat 1977-imili ukiut qulikkaat tulleriiaat ingerlaneranni agguaqatigiissillugit qaammatinik pingasunik siusinaarlutik inuusuttunngulernermut ikaarsaatalersimasut, misissuinerup takutippaa.

Tassa imaappoq, ullutsinni niviarsiaqqat 1970-ikkunni niviarsiaqqanut naleqqiullutik inuusuttunngulernermut agguaqatigiisillugu ukiumik ataatsimik siusinaarlutik ikaarsaartalersimapput.

Sumik pissuteqarnersoq ilisimaneqanngilaq

Nunarsuarmi niviarsiaqqat inuusuttunngulernermut ikaarsaartarnerisa allanngornerat aaqqissuussaalluakkamik siullerpaamik taama misissuiffigineqarput.

Niviarsiaqqallu inuusuttunngulernermut siusinaarlutik ikaarsaartalersimanerat sumik pissuteqarnersoq sukumiinerusumik ilisimaneqanngilaq.

Rigshospitalimi nakorsaaneq Københavns Universitetimilu aamma  professoriusoq, Anders Juul,  taama oqarpoq. Taanna misissuinermik aallarniisuuvoq.

- Niviarsiaqqammi 1. klassemi atuartut ilutiminnut naleqqiullutik inuusuttunngulernermut siusinaartumik ikaarsaaraangamik matoqqasunngukkajuttarput. Nikallortarput kanngusuttarlutillu, timikkullu ineriartornerminni aamma inorsalersarlutik, Anders Juul oqarpoq.

Niviarsiaqqat qassinik ukioqarlutik iviangeqalersarnerat inuusuttunngulernermut ikaarsaalersartarnerannik misissuinermi tunngavigineqarput.

Inuusuttunngulernermut ikaarsaarneq atuartitsissutigineqartalertariaqartoq 

Taamammat niviarsiaqqat arfineq-pingasunik ukiullit 10-20 procentii inuusuttunngulernermut ikaarsaalersarsimappata, taava nalinginnaasutut killigitinneqartoq immaqa appartariaqarparput, Anders Juul oqarpoq.

Timi inuusuttunngulernermullu ikaarsaarneq atuartunut nukarlernut atuartitsissutigineqartalertariaqartut, Lene Stavnsgaard, kinguaassiuutinik ilinniartitsineq inuiaallu pillugit suliniaqatigiiffik Sex og Samfundimeersoq, isumaqarpoq.

- Suiaassuseq timilu meeqqanut nassuiaannissaat maannamut pikkoriffigivallaarsimanngilarput. Nassuiaannissaat pingaaruteqarpoq, siusinnerusukkullu taamaaliortalertariaqassagunarpugut, Lene Stavnsgaard oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat