Nunarsuarmi siuttut: Isumaqatiigiissutissaq inissittariaqarpoq

Qullersat isumaqatigiillutik oqaatigaat isumaqatigiissutissap inaarneqarnissaa anguniarlugu illuatungeriit ikioqatigiittariaqartut.

- Københavnimi tamatsinnut iluaqutaasussamik silap pissusaa pillugu isumaqatigiissut ullumikkut naammassiniartigu. Inuillu tamarsuarmik pitsaanerusumik illersorneqarsinnaasumillu siunissaqarnissaannut suleqatigiinniarta. Siuttuunissarsi pisussaaffisilu naatsorsuutigaakka, Naalagaaffiit Peqatigiit allattaanerat, Ban Ki-moon Bella Centerimi ullumi oqalugiartut pingaarnersaat taama aallarniuteqarpoq.

Brasiliap præsidentia sunniuteqarluartartoq Luiz Inácio da Silva, aamma Lulamik ateruseqartinneqartoq, allassimasumik atuagassaqarnani oqaluttarfimmut qaqivoq. Brasilia isumaqatigiissuteqarnissamut piareersimasoq nalunaarutigaa, aningaasaliisinnaasorlu tamanna pisariaqalissappat.

Tamatumanili gassit silaannarmik kissatsitsiartortartut taamaallaat pineqannginnerat kisiannili aamma nunat piitsut ineriartornissamut periarfissinneqartariaqarnerat nunat pisuut nassuerutigisariaqaraat pisariaqartoq, Lulap naqissuserpaa.

- Pisuujugutta piitsuuguttaluunniit suleqatigittariaqarpugut, nunarsuullu sammiviiniit tamanit oqaatigisariaqarparput, angutit pilliutiginissaat arnallu kappialanissaat aarleqqutigigipput, Lula oqalugiarnermini inersuarmit arlaleriarluni ersartaatigineqartoq oqarpoq.

Taavalu sivisuumik utaqqineqarsimasup amerikamiut præsidentiata Barack Obamap oqalugiarnissaa tullinnguuppoq.

- Unneqqarittariaqarpunga. Nunarsuarmiut tamarmik ullumi isiginnaarneranni isumaqarpunga, ataatsimoorluta suliniuteqarsinnaanermik ingerlatsisinnaanerput ulorianartorsiorlunilu ajalusooqqajaasoq. Ataatsimoorussamik aarlerinartorsiutitsinnut atatillugu qunusuissuseqarsinnaallutalu aalajangiisinnaassuseqarsinnaasugut upperaara. Tamannami pillugu ullumi maaniippunga - oqalukkiartornanga iliuuseqariartorlungali.

Amerikap nunarsuarmi aningaasarsiortut annersaattut mingutsitsisullu tulliattut silap pissusaata allannguutaasa akiorniarnissaannut akisussaaffeqarpoq akisussaassuseqartutullu iliornissarput siunertaraarput.

Taama oqarpoq Obama erseqqissarpaalu USA ullumi isumaqatigiissutip inaarnissaanut piareersimasoq.