Nunarsuarmi raajat akii misissorneqalerput

Naalakkersuisut raajat akii pillugit ataatsimiittartoqatigiinnik nunarsuarmi raajat akiinik misissuisussanik pilersitsipput. Ataatsimiittartoqatigiit misissuinitik naammassereerpatigit naalakkersuisut aalajangiiffigissavaat raajarniat 215 millioni koruunit piumasaat qanoq anguneqarsinnaanersut. Aalisarnermut Naalakkersuisup Finn Karlsenip neriuutigaa aaqqiisoqarnissaanut piffissaq sivikitsuinnaassasoq.

-Piffissap sivikinnerpaap atorneqarnissaa qangali kissaatigivara. Naatsorsuutigigaluarpara politikkikkut akuleruttoqarani namminneq isumaqatigiissinnaajumaartut, taamaammallu politikkikkut akulerunnissaq qanittuararsuuvoq. Akuleruttariaqarnerluta eqqartorparput, taamaammallu ataatsimiititaliamik sulisitsivugut. Taakku naammassippata naatsorsuutigaarput KNAPK Royal Greenlandilu ataatsimeeqatigissallugit, Finn Karlsen oqarpoq.

Landskarsiminngaanit tapiisarnerit unitsinniarneqarmata tapiisoqarnissat naalakkersuisut tunuarsimaarfigigaat, Finn Karlsenip oqaatigaa.

-Periarfissat allat tamarmik ajornarsivissimassappata taanna periarfissatut kingullerpaarpaatut atorneqassaaq. Misissuinerillu allanik ammaassinngippata aatsaat taanna pissaaq, Finn Karlsen naggasiivoq.

Raajat akii pillugit ataatsimiittartoqatigiit naalakkersuisunit pilersinneqartut Aalisarnermut Pisortaqarfimmit, KNAPK-mit Royal Greenlandimit Aalisartullu Siunnersuisooqatigiivinit inuttaqartinneqarput.