Nunarsuarmi qaqqat portunersaata tullia qaqiniarnialerpaa
Qaqqasiortartup ilisimaneqarluartup Nick Nielsen-ip, 2005-imi kalaallinit siullersaalluni nunarsuarmi qaqqat portunersaannik qaqisisup, nunarsuarmi qaqqat portunersaata tullia, K2-mik taaguuteqartoq, Jacob Widhke Nuummeersoq peqatigalugu, qaqiniarnialerpaa.
Allattoq Louise M. Kleemann
juunip 24-at 2008 13:55
- Massakkut qaqqarsuaq K2 ornipparput, ullut marluk ingerlaneranni 50 km pisoreerpugut. Ullut sisamat qaangiuppata K2-p sioraanut anngunnissarput naatsorsuutigivarput , Nick Nielsen oqaluttuarpoq.
K2 Mount Everestimit 200 meterinik pukkinneruvoq, nunarsuarmilu qaqqanut qaqiuminaannerpaanut ilaalluni. 1954-imiilli qaqqasiortoqartalermat taamaallaat 250-it K2-p noorpiaanut anngussimapput, sanilliullugu Mount Everest-i qaqqasiortunit 3.000-init qaqineqareerpoq.
Qaqqarsuaq 8.611 meterinik portussusilik Pakistanip Kinallu killeqarfiisa akornanniippoq, 1954-imilu siullermik qaqineqarluni.
