Nunarsuarmi qaqqat navianarnersaasa ilaat qaqiniaraa
Qaqqasiortartullu juunip 18-ianni aallassararneqarput.
- Ajoraluartumik Pakistanimi eqqissiviilliortoqarpoq. Taamaakkaluartoq aalajangersimavugut aallarniarluta. Nunanut allanut Ministereqarfik naapertorlugu Pakistanimiinneq navianartoqarpoq, namminerlu akisussaaffigalugu tassaniissaagut. Neriuppugut aallannginnitsinni perulluliornerit unikaallakkumaartut, Nick Nielsen taama Sermitsiamut oqarpoq.
K2 nunarsuarmi qaqqat qaqiniarlugit ajornakusoornerpaat navianarnerpaallu ilagaat. Qaqqaq immap qaavaniit 8.611 meterinik portussusilik nunarsuarmi qaqqat portunersaasa tulleraa. Taanna Pakistanip, Kinap Indiallu killeqarfiisa eqqaanni Karskorambjerginik taaneqartartuni inissisimavoq.
Nick Nielsen Jakob P. Wetchellu naatsorsuutigaat angalanertik augustimi naammassissallugu.
