Nunarsuarmi pisuunerpaap Obama tapersersorpaa

Nunarsuarmi pisuunerpaatut isigineqartup Warren Buffet-ip Barack Obamap USA-mi præsidentinngorniarluni ilungersuuteqarnera maanna tapersersulerpaa, tamanna Tysklandimi tusagassiortunik katersuutsitsinermini ilisimatitsissutigaa.
Allattoq Louise M. Kleemann
maajip 20-at 2008 09:09

77-inik ukiulik miliardiutilik taanna nassuiaavoq, Obamap aamma demokraatit præsidentimut qinigassangortinniagaata allap tassa Hillary Clintonip tapersersornissaat neqeroorutigisimallugu, maannali Obama tapersersorniarlugu aalajangersimalluni, taassumami partiip qinigassanngortitassaatut ajugaanissaa ilimanarnerulermat.

- Obama præsidentimut qinigaassappat nuannaartorujussuussaanga, Buffett oqarpoq.

Amerikamiup aningaasaatilissuup taassuma nunarsuarmi pisuunerpaatut isigineqartartoq Bill Gates ukiormanna qaangerpaa, tassa inuussutissarsiorneq pillugu atuagassiap Forbes-ip naatsorsuinera malillugu.

Buffett-ip aningaasaatai ukiut ingerlanerini 52 milliard dollars-init 62 milliard dollarsinut amerleriarsimapput. Taamaalilluni præsidentimut qineqqusaarneq aallartilluarpat tapiissutissaqalaarnissaa ilimagineqarsinnaavoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq