Nunarsuarmi pissartanngorniulluni isikkamik arsaanneq aallartilersoq

Avaqqussinnaanngilarput tikiinnariartigu – nunarsuarmi isikkamik arsalluni unamminerit nalunaaqutap akunnera ataaseq qaangiuppat Tysklandimi aallartissapput. Tysklandip Costa Rica unammissavaa. Tyskilli ajungaaniutivinnermut anngunnissartik kisiat pinnagu aamma tusaamaneqarnerlunnertik qaangerniarsaraat, taamaattumik ”Nunarsuarmioqatigiit ikinngutigalugit tikeraartorissavagut” unammersuarnermi oqasinnaarineqassaaq.

Tysklandimi kanselerip Angela Merkelip naalakkersuisooqataasalu nunartik nutaaliasutut tyskillu akaarinnittutut avammut saqqummiuniarsaraat. Taamatut saqqummiussinerat nuannerpallaanngitsumik tunngaveqarpoq. Nunarsuarmi isikkamik arsalluni unammersuarnissat qaammatit arlallit sioqqullugit tusagassiorfitsigut Tysklandimi pisut assigiinngitsut sakkortuumik sammineqarsimapput; soorlu ammip qalipaataa tunngavigalugu immikkoortitsilluni persuttaaneq, sukorsip 16-inik ukiullip inunnik 33-inik savimmik kapuuisimanera sammineqarsimapput tamatumalu kingunerisaanik isumannaallisaanerup pitsaasusaa nunanit allamiunit qularineqalersimavoq. Qularneq qaangerniarlugu politiit isumannaallissaasullu sapinngisartik naapertorlugu eqqissisimatitsiniarsaripput.

Politiit 300.000-it, sakkutuut 7.000-t namminersorlutillu isumannaallisaanermik suliaqartut 15.000-t isikkamik arsaalluni unammersuarnerup nalaani eqqissisimatitsiniarsarissapput. Taakkua saniatigut tyskit avatangiisinik mingutitsinaveersaarneq nunarsuarmioqatigiinnut oqariartuutiginiarneqarpoq.

Nunarsuarmi isikkamik arsaattartut kattuffissuata FIFA-p siullerpaamik nuna ilaasortaatitalik suleqatigalugu avatangiisinik mingutitsinaveersaarneq anguniarlugu suliniuteqarpoq.

Arsaakkiat nalinginnaasumik timmisartortinneqaratik qimuttuitsortinneqarlutik unammiartinneqarsimapput. Unamminersuarnermilu inuit amerlanerpaat qimuttuitsorlutik unammisarfimmukartarniassammata immikkut ittumik qimuttuitsuutillit kattuffissuarmit isumaqatigiissusiorfigineqarsimapput.

Nunarsuami isikkamik arsaalluni juulip quligiluaani pissartanngorniuttoqassaaq.