Nunarsuarmi pisoqarfiunerpaat qullit
Irakimi, Gaza-mi nunarsuarmilu sorsuffiusuni allani qaartitsiuarsinnarput, taakkulu nunarsuarmiunit malinnaaffigeqqissaarneqarput. Taamaattorli nutaarsiassaqartitsivinnit sammineqanngitsunik inuit millionilikkaat aaqqiagiinnginnernit ajornartorsiornernillu atugarliortitaapput, taakkualu nunarsuarmiunit sammineqarnerusariaqaraluarput.
Taama isumaqarput suliniaqatigiiffik “Læger uden Grænser”. Taakkua nunarsuarmi pisoqarfiunerpaat qulit, nunarsuarmiunit soqutigineqanngitsut ukiumoortumik saqqummiuppaat.
Taakkunannga siullinngortinneqarsimavoq Centralafrikanske Republik. Tassani illoqarfiit nunaannarmiittut ikuallatsinneqartarput inuillu tuusintilikkaat qimaasariaqartarput sakkulersorluni aaqqiagiinnginnerit pissutigalugit. Tamakkua nunarsuarmiunit tusarneqarneq ajorput. 2006-imi danskit aviisiata ataasiinnaap Centralafrikanske Republikimi pissutsit allaaserisimavaat.
Tusagassiorfiit tamakkuninnga sammisaqannginnerat ajornartorsiuterujussuusoq suliniaqatigiiffik Læger uden Grænser nalunaarpoq.
Kisianni sorsunnerit aserorterinerillu qanoq atsigisumik uagut inuttut tusartuartarnissaat killeqanngila? Tamanna killeqanngilaq, suliniaqatigiiffiup Danmarkimi immikkoortortaani siulittaasoq Søren Brix Christensen oqarpoq.
- Siornaakkunni malerujussuit aseruinerannut katersuiniaratta aningaasat katersukkavut ima amerlatigipput, allaat inuit aperisariaqarlutigik aningaasat ilaat nunarsuarmi ikiortariaqarnerpaanut allanut atorsinnaanerlutigik. Inuit tamanna akueraat aamma paaserusuppaat nunarsuarmi allami susoqarnersoq sorsuffiusut tusartuakkatik kisiisa pinnagit, Søren Brix Christensen oqarpoq.
Nunarsuarmi pisoqarfiunerpaani qulini Centralafrikanske Republik-ip saniatigut ilaapput tb, kaannersuit, nakuuserneq, Tjetjeniami, Sri Lanka-mi Congo-mi, Somaliami, Haiti-mi Colombiamilu sorsunnerit aserorterinerillu.
