Inuit coronavirusimik nunarsuaq tamakkerlugu tunillanneqarsimasut 50 millionit sinnerpaat.

Tamanna ilisimatusarfiup John Hopkins Universityp nalunaarsugaanni sapaatiummat erserpoq.

Tassa imaappoq, coronavirusip Kinami illoqarfissuarmi millioninik inulimmi Wuhanimi 2019-ip naanerani tuniluutilermalli inuit tunillanneqarsimasut aatsaat taama amerlatigipput.

Coronavirusi tuniluutilermalli nunarsuarmi inuit ulluinnarni inuunerannut sunniuteqaqisumik nunarsuaq tamakkerlugu  tunillaassuuppoq.

AAMMA ATUARUK Nunarsuarmi inuit coronavirusimik tunillanneqarsimasut 32 millionit sinnersimagaat

Coronavirusip qanoq tunillaassuutsiginersoq apeqqutaalluni nunat tamalaat killeqarfiit matuneqartarlutillu ammaqqinneqartarput.

Aasaq tunillaassuuppiarunnaariarluni ukiaq tunillaassuuteqqilerpoq. Europap kujasinnerusortaani nunani soorlu Spaniami, Italiami Frankrigimilu tunillanneqarsimasutut maannamut paasineqartut aatsaat taama amerlatigipput.

Misissortittulli coronavirusip nunarsuaq tamakkerlugu upernaaq tunillaassuutileruttornerani misissortittunit amerlanerunerat, tunillanneqarsimasutut paasineqartut aatsaat taama amerlatiginerannut peqqutaaqataavoq.