Nunarsuarmi innuttaasut pingajorarterutaat iliuuseqaqqusipput
Nunarsuarmi inuit pingajorarterutingajaat isumaqarput silap kissakkiartornera piaartumik qanoq iliuuseqarfigisariaqartoq.
BBC-p isumasiuinerata tamanna takutippaa, nunarsuarmi Naalakkersuisut ilarpassassuisa FN-imi silap pissussaata allanngoriartornera pillugu ataatsimiileruttortut.
Isumasiuinermi inuit 22.000-it nunanit 21-neersut apersorneqarsimapput, amerlanerussuteqarluartullu isumaqarput piaartumik silap kissakkiartornera qanoq iliuuseqarfigisariaqartoq. Spaniami isumasiorneqartut 90 procentii isumaqarput piaartumik iliuuseqartariaqartugut, aammali nunani mingutsitsinerpaani, Kina-mi USA-milu amerlanerussuteqartut piaartumik iliuuseqartoqarnissaa pingaartippaat, tassa USA-mi apersorneqartut 59 procentiisa, Kina-milu 70 procentiisa. BBC-p isumasiunera, 2009-mi Københavnimi malunnaatilinnik periusissanik isumaqatigiissusiornissamik siunniussaqartunut tusarluarnaqaaq, taamaalilluni Nunat Tamat Silaannarmik Mingutsitsinnginnissamik Kyoto-mi isumaqatigiissutaata tutsuiginartumik taarserneqarnissaa isumalluarnarnerulermat.
Isumasiuineq USA-p præsidentianut aamma eqqaasitsissutigineqarsinnaasoq DR-imi ilanngutassiortoq oqarpoq; nunani tamani, gassit silamik kissakkiartortitsisut milliartortittariaqarnerannut iliuuseqarnissaat pisariaqarluinnarmat. Ippassaq ataatsimiinnermi George Bush ilaanngikkaluartoq FN-p qullersaata oqaatigaa, nunat tamat naalakkersuisuisa isumaqatigiillutik siunniussaat, decembarimi Bali-mi ataatsimiinnissami silap pissusaata allangoriartornerata malunaatilimmik qanoq iliuuseqarfiginissaanut isumaqatigiissinnaannissaq neriunaateqalersoq. Bali-mi ataatsimiinnermi aallartisarneqartut, 2009-mi Københavnimi isumaqatigiissusianngorlugit suliarineqartussaapput.
