Nunarsuarmi ikiaroornartuerniarneq annikillivoq
Nunarsuarmik aningaasarsiornerup ajorsisimanera ikiaroornartumik nunarsuarmi pilersuinermik annikilleriartitsisimanersoq nalunarluinnarpoq, qularutissaanngilarli ikiaroornartuliortartut ajornartorsiuleriartorput. Tamanna aqqusinerni atuisartunut tuniniaanerup annikilleriarujussuarsimanerata takutippaa, taama FN-imi ikiaroornartut pinerluuteqartarnerillu pillugit nakkutilliisoqatigiit ippassaq nalunaarput.
- Ikiaroornartut sakkortuut allanik akoorneqarsimasut akitsoraluttuinnartullu takussaalernerat, ikiaroornartulerisut ajornartorsioraluttuinnarnerannik takutitsivoq. Ikiaroornartut akuitsuujunnaariartornerat akitsorujussuarnerallu takussutissaavoq, Antonio Maria Costa oqarpoq.
Kangiani Afghanistani opiumiliortarfissuartut ilisimaneqartoq ukioq kingulleq 19 procentinik ikinnerusumik tunisassiorsimavoq, Amerika Kujallermilu Colombiami kokainimik tunisassiorneq 18 procentimik milleriarsimavoq.
Naalagaaffiit Peqatigiit nalunaarusiaata aamma paasinarsisippaa ikiaroornartut sakkortuut arsaarinnissutaasut nunani tamalaani amerligaluttuinnartut.
- Ilimagaarput kokainimik tunisassiat 42 procentii arsaarinnissutaasimasut, tamannalu naalagaaffit arlallit suleqatigiilluarnerannik pissuteqarpoq, Costa oqarpoq.
- Taamaammat nunani tamalaani ikiaroornartunik sakkortunerusunik atuiffiusuni oqartussanut siunnersuutissara tassaavoq. Ikiaroortartut pinerluttutut pinnagit, napparsimasutut pisalerniarsigit. Atuisut malersornagit anngiortumik ikiaroornartumik eqqussuisut malersorniarsigit, FN-ip nalunaarusiaa tunngavigalugu Antonio Maria Costa kajumissaarivoq.
