Nunarsuarmi aningaasarsiornikkut ajalusoortoqarnissaa siulittuutigineqarpoq

Nunarsuarmi aningaasarsiornikkut ajalusoortoqarnissaa, aningaasarsiornerullu qaammatini kingullerni ilorraap tungaanut sangunissaa, aningaasarsiorneq pillugu ilisimatuup, Robert Sprechterip, siulittuutigaa. Aningaasarsiornerulli killup tungaanut aallaqqinnissaa maanna aamma siulittuutigaa. Aviisip Jyllandspostenip nittartagaani taama allaaserinnittoqarpoq.
aggustip 06-at 2009 11:00

Naak aningaasarsiornermik ilisimasallit amerlanerit isumalluaraluartut, Robert Sprechterip oqaasii nikallunganarsinnaapput.

Sprechterip aningaasarsiorneq pillugu naliliisartut Elliot Wave-kkut siuttuuffigai. Inuup qisuariartaasia aningaasarsiornermullu sunniuteqaatigisinnaasai eqqarsaatigalugit Elliot Wave-kkut tunngavilersuutigisarpaat.

USA-mi aktianik nioqquteqartarfimmi S&P indeksimi aktiat nalingisa appariartorlutillu qaffakkiartornissaat taassuma eqqoriarsinnaasimavai, aningaasarsiornerullu killup tungaanut aallaqqinnissaa maanna siulittuutigalugu.

Aningaasarsiornerullu ajalusooqqinnissaata saniatigut, nioqqutissiassat, ujaqqat erlinnartut nalingisa kiisalu illut pigisat nalingisa appariartoqqinnissaat taassuma eqqoriarpaa.

USA-mi aningaasarsiornerup ukioq manna pitsanngoriartornissaa aningaasarsiornermik ilisimasallit 90 procentiisa eqqoriarpaat, naallu suliffissaaleqisut USA-mi amerliartoraluartut, innuttaasut ataatsimut isigalugit isumalluartut taassuma oqaatigaa.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq