Nunarsuarmi aningaasaateqarfik Kalaallit Nunaata iluaqutiginavianngilaa
Nunarsuarmi aningaasaateqarfik tallimanngorpat pilersinneqartussaq Kalaallit Nunaannit aamma iluaqutaasinnaanissaa, nunanut allanut ministerip, Per Stig Møllerip tusagassiortunik katersortitsinermi oqaatigigaluarpaa, tamannali Kuupik Kleistimit qularineqarpoq.
Kalaallit Nunaat nunat piitsunut sanilliutissagaanni inissisimalluartorujussuuvoq, taamaattoq Danmarkimut sanilliutissagaanni mumingarilluinnarpaa, taamaattumik nunanut piitsunut assersuulluta inissinneqarnissarput killeqartorujussuuvoq, Kuupik Kleist oqarpoq.
Kalaallit Nunaat danskit naalagaaffiannut atavoq, EU-mullu ilaasortaanani tamannalu ajornartorsiutaavoq, Danmarki nammineerluni silap pissusaa pillugu imaluunniit nunat EU-mut ilaasortat assigalugit isumaqatigiissusiussanersoq suli aalajangiiffigineqanngilaq.
- Sila pissusaa pillugu Danmarki imaluunniit EU aqqutigalugu isumaqatigiissusiortoqassagaluarpat uatsinnut pingaarnerpaavoq uagut pisariaqartitavut aallaavigalugit isumaqatigiissummik qulakkeerinninnissaq, taamaattumik una silap pissusaa pillugu marlunnik assigiinngitsunik Danmarkimut EU-mullu atorneqarsinnaasunik nassuiaasiorsimasugut.
Ilanngutassiaq unnugu Qanoruukkut takujuk.
