Nunarsuarmi AIDS-ip ullua ilagiinnit malunnartinneqassaaq

Carina Wøhlk tallimanngorpat naneruusisarluni qinoqatigiissitsissaaq.

Ataqatigiissaarisoq Nuummi palasi Aviaaja Rohmann Pedersen pisussaq pillugu ima oqarpoq:

- Qinoqatigiissitsinissaq siunnersuutigineqarmat isumassarsiatsialattut isigalugu akueraarput. Carina Wøhlk suliani pillugu Ilimmarfimmi oqalugiartussaavoq. Tassungalu atatillugu HIV-mik AIDS-imillu nappaatilinnik Nunatsinni sullissineq paasisaqarusuffigisimavaa. Taamaammat tallimanngorpat pisussami, Dronning Ingridip napparsimaviani nakorsaq Karen Ladefoged, aamma peqataassaaq, Aviaaja Rohmann Pedersen oqarpoq.

Ullumi ulloq decembarip aallaqqaataa tassaavoq "World AIDS Day", nunarsuarmi AIDS-ip ullua. Nakorsaq Millie Rydbacken HIV-mik tunillanneqarsimasut qanoq inuunerannik puitsaasumillu inuuneqarnissamut namminneq qanoq isiginninnerannik apersuilluni 2008-mi aallartippoq. Misissuineq suli nalunaarusiaralugu naammassinngikkaluartoq atuagassiami ""Vi og HIV"-imi julimi saqqummersumi allaaserineqarpoq Kalaallit Nunaanni HIV-mik nappaateqartut ataatsimut isigineqarnerat nunani allani HIV-mik nappateqartunut naleqqiullugu allaanerusoq.

HIV-mik tunillanneqarsimasut Kalaallit Nunaanni agguaqatigiisillugu ukiunik 15-20-nik angajulliupput, tassaanerullutillu anguteqatiginngisamik arnaqatiginngisamillu atoqateqartartut.

Aamma paasineqarpoq HIV-mik nappaateqalersimasut amerlanersaat tassaasut meeqqat atuarfiannit anigamilli allamik ilinniagaqarimanngitsut, taaneqarsinnasut Kalaallit Nunaanni pissakinnerpaat. Agguaqatigiisillugumi ukiumut isertitaat 88.000 koruuniupput.

Millie Rydbackenip nunatsinni misissuinerata aamma takutippaa HIV-mik nappaateqartut akornanni imigassamik atornerluisuuneq maluginiagassaanngitsoq.

Nunarsuarmi AIDS-ip ullua nalliussiniarlugu, Hans Egedep Oqaluffiani naneruusisarluni tallimanngorpat qinoqatigiinnissami HIV-mik AIDS-imillu eqqugaasut qinoqatigiissapput, AIDS-imillu toqquteqarsimasut eqqaaniarneqassallutik.

Carin Wøhlkip Københavnimi HIV/AIDS-imik eqqugaasut palasiattut atorfia nutaajuvoq, pilersinneqarnerani siunertaalluni HIV-p AIDS-illu ammanerusumik oqaluuserineqartalernissaat.

- HIV-mik AIDS-imillu nappaateqartut qinoqatigisarpai, saniatigullu nappaatit pillugit paasisitsiniaasarluni. Nunatsinni taamaattumik palaseqalernissaq aamma pilerinarpoq, oqaluusereqqusaanngitsutut isigisaq ammaneruffigineqalerniassammat, Aviaaja Rohmann Pedersen oqarpoq nangillunilu:

- HIV-mik AIDS-imillu eqqugaasut kiserliortutut misigisarmata palasimik tapersersorneqarnissaq paasisitsiniaanerunissarlu pisariaqarput. Taamaammat-una nakorsaq tallimanngorpat qinoqatigiissitsilerutta aamma peqataassasoq, Aviaaja Rohmann Pedersen nassuiaavoq.

HIV aamma AIDS pillugu Københavnimi palasi Carina Wøhlk, Nuummi Hans Egedep oqaluffiani ualikkut tallimanut qinoqatigiissitsissaaq.