- Nunarsuarmi tamarmi naalakkersuinermik ingerlatsinerup maannakkut nalerpiaaniippugut.  USA Danmarkiluunniit massakkorpiaq toqqagassarigutsigit, Danmark, Nato aamma EU toqqarpagut. Avissaartuunnissamut maanna piffissaanngilaq, ataatsimoorfimmilli ilisimalluakkatsinnik kissaatigisatsinnillu piorsaaqatigiissaagut. 

- USA-p Danmarkillu akornanni qinersissagutta, taava Danmark, Nato aamma EU qinertariaqarpagut. Avissaartuunnissamut  maanna piffissaanngilaq, ataatsimoornitsinnilli ilisimalluakkatsinnik kissaatigisatsinnillu ineriartortitseqatigiinnissatsinnut piffissaavoq.

Jens-Frederik Nielsen (D), danskit ministeriunerat Mette Frederiksen peqatigalugu Christiansborgimi  tusagassiortunik marlunngornermi katersortitsinerminni taama oqarpoq, ministeriunerlu nunatsinni innuttaasunut aamma oqariartuuteqarpoq.

- Asasagut kalaallit. Ataatsimoortugut ilisimassavarsi. Ullumikkut aqagulu, aamma taamaaliortuassaagut, Mette Frederiksen oqarpoq.

Kalaallit Nunaata USA-mit sapaatip-akunnerani kingullermi tatineqaraluttuinnareersorlu præsidentillu ’Kalaallit Nunaata pigilernissaa eqqarsartaatsikkut pisariaqarnerarlugu' oqareersorlu, tusagassiortunik katersortitsineq pivoq.

Naalakkersuisut Kunngeqarfik Danmarkimut tunngatillugu ataatsimoornersut danskit tusagassiiviisa apeqquseqattaarpaat.

Naalakkersuisut siulittaasuata ataatsimoortoqarnera naqissuserlugu erseqqissapallappaa.

- Kalaallit Nunaat USA-mit pigineqarusunngilaq; USA-mit aqunneqarusunngilaq; USA-mut ilanngukkusunngilaq. Kalaallit Nunaat ullumitut ittoq, Kunngeqarfik Danmarkimut atasoq toqqarparput.

- Nunarsuarmi tamarmi naalakkersuinermik ingerlatsinerup maannakkut ajornartorsiorfianiippugut. USA-p Danmarkillu akornanni qinersissagutta, taava Danmark, Nato aamma EU qinertariaqarpagut. Avissaartuunnissamut maanna piffissaanngilaq, ataatsimoornitsinnilli ilisimalluakkatsinnik kissaatigisatsinnillu ineriartortitseqatigiinnissatsinnut piffissaavoq.

Naalakkersuisut Danmarkimut atanissaq toqqaraat, Jens-Frederik Nielsenip maanna oqaatigimmagu, Kalaallit Nunaanni namminersulivinnissaq pillugu oqalukkunnaartoqarsimanersoq TV2-mi tusagassiortup apeqqutigaa.

- Nunatsinni pissutsit ataavartumik oqaloqatigiissutigiuarpagut. Ataatsimoornissatsinnut piffissanngorpoq. Kalaallit Nunaat Kunngeqarfimmi Danmarkimiippoq, nunarsuarmilu tunngaviusumik pisinnaatitaaffiit najoqqutassiallu illersornissaannut ataatsimooqatigiilluinnarpugut, naalakkersuisut siulittaasuat akivoq.

Nunarsuarmi aaqqissuussaaneq navianartumiittoq

Jens-Frederik Nielsen aamma Mette Frederiksen tusarliussatik saqqummiukkumallugit tamaviaarput.

- Nunarput aaqqiagiinngissutigineqartup qeqqaniippoq. Tatineqarnerup aamma qeqqaniilluta. Aammali silarsuarmi aaqqissuussaaneq ilisimasarput apeqquserneqarpoq. Aaqqissuussaaneq atuukkunnaassappat nunarput nunarsuarlu tamarmi akioruminaatsunik ilungersuanartumiilissapput, Jens-Frederik Nielsen oqarpoq.

Jens-Frederik Nielsenip danskillu ministeriunerata USA-mut tunngatillugu pissutsinik eqqartuineri siornatigut assigiinngissuteqartarput.

Naalakkersuisut siulittaasuat tamanna pillugu eqqissisimaqqusivoq, Mette Frederiksenilli navianartup suli qaangiussimannginnera oqaatigalugu.

Jens-Frederik Nielsenip pissutsit ilungersunartuuneri KNR-imut ippassaq siullermeerluni oqaatigaa. Tusagassiortunillu ullumikkut katersortitsinermi aamma taama oqarpoq.

- Pissutsit ilungersunartorujussuupput, politikikkut soqutigisat nunatsinnut innuttaasunullu tatisimannittorujussuupput, naalakkersuisut siulittaasuat oqarpoq.

Nunarsuarmi aaqqissuussaaneq pillugu Danmarkimi ministeriuneq assingusumik oqaaseqarpoq.

- Nunat mikisut nunanut anginerusunut qunugisaqannginnissaannut tunngassuteqarpoq. Nunarsuarmi aaqqissuussaaneq illersorparput.  Ataqatigiippugut (USA-mut, aaqq.) aamma ingiaqatigiissaagut. Tusarliussarput erseqqippoq: Kalaallit Nunaat tuniniarneqanngilaq.

Issittumi isumannaallisaaneq 

USA-p præsidentiata Donald Trumpip Kalaallit Nunaata tiguarnissaanut kissaateqarnerminut  nunami isumannaallisaanissaq nunanilu tamalaani isumannaallisaanissaq pissutigalugu USA-p nunarput pisariaqartillugu arlaleriarluni  tunngavilersuutigisarpaa.

Naalakkersuisut USA-mit pissusilersuutigineqartunik akuerinnissinnaanerat sumut killeqarnersoq, KNR-ip Jens-Frederik Nielsenimut tusagassiortunik marlunngornermi katersortitsisoqarnerani apeqqutigaa.

- Ulloq siullermili oqarpugut, isummernerpullu erseqqarilluinnarpoq: Kalaallit Nunaat nunanut killernut ilaajuaannassaaq, naleqartitatsinnut tunngaviusunut ilaajuaannassalluni.

Kalaallit Nunaata Danmarkillu Issittumi isumannaallisaanissaq pillugu Natomi suleqatigiinneq tapersersoraat, danskit ministeriunerata aamma oqaatigaa.

- Isumannaallisaanermut tunngatillugu suleqatigiilluta iliuuseqarnerujussuusinnaavugut iliuuseqarnerusariaqarlutalu, Mette Frederiksen oqarpoq.

- Soorlu nunat Baltikum-imiittut Natop kangia Ruslandimut illersorniarlugu kisimiinngitsut, tamannami Natomi peqatigiinnut pingaaruteqarmat, Issittumi tamanna aamma atuuppoq.