Nunarsuaq ulorianartorsiorpoq

Ilisimatusartut uuttortaanerat naapertorlugu nunarsuatsinni gassit silaannarmik kissakkiartortitsisut aniatinneqartut ima annertutigipput, allaat silap kiassusiata ukiut qulikkaartut arlaqanngitsut qaangiuppata agguaqatigiissillugu 2 gradit taakku qaangereersimassallugit, aviisimi Politikenimi taama allaaserinnittoqarpoq.

2 gradit taakkua suliffissuaqarneq sioqqulluguli, silap pissusaanik ilisimatusartut aamma EU-mi killiliussassatut isigineqaraluarput, tassami isumaqartoqarmat inuit pilersitaannik nunarsuup kiatsikkiartornera gradit taakku marluk qaangerpagit ingasaginaannarani nunarsuaq tamakkerlugu ajunaarnersuartut isigisariaqalissasoq. Tassami agguaqatigiissillugu nunarsuaq to gradit sinnerlugit kiatsinneruppat, taava soorlu Amazonap orpippassuaqarfia ajutoorluinnartussaavoq imaluunniit nunatta sermersua aattussaavoq imarsuit qaffannerannik kinguneqartumik. Tamannalu kingunerlorujussuartussaasoq oqaatigineqarpoq.

Naalagaaffiit Peqatigiit silap pissusaanik immikkut ilisimasalittaasa naatsorsuinerat naapertorlugu ukioq 2100 tikitsinnagu nunarsuup kiassusaa agguaqatigiissillugu 1,8 gradimiit 4 gradimut qaffariassangatinneqarpoq.

Kisianni massakkut gassinik silaannarmik kissakkiartortitsisunik aniatitsineq sukkasoorujussuarmik aqunneqarsinnaanngitsumik annertusiartorpoq. Taama uparuaavoq danskit ilisimatusarnermi pisortaat Jens Hesselbjerg Danmarks Meteorologiske Institutimeersoq. Tamatuma kinguneranik oqaatigineqartunit 1,8 gradinit maanna 4 gradit qaninnerulersimassagivut oqaatigaa.