Nunarsuaq tamakkerlugu imminut toquttarnerup akiorneranut ulloq
Kalaallit Nunaanni tamanna malunnartinniarlugu sumiiffinni assigiinngitsuni assigiinngitsunik sammisaqartitsisoqarpoq.
- Kalaallit Nunaanni imminut toquttartut amerlavallaarput. Tamanna pinngitsoortinniassavarput taamaattumillu imminut toquttarnermut pitsaaliuiniarluta politikkikkut salliutipparput. Imminut toquttarneq sammissallugu ilungersunartuuvoq paquminarluni eqqartoruminaattartoq. Taamaattumillu nuannaarutigaara ulloq malunnartinniarlugu tapiissutinik qinnuteqartut amerlammata, taamaasillunilu imminut toquttarnerup pitsaaliornissaanik aaqqissuussisoqarsinnaalerluni”, peqqissutsimut naalakkersuisoq, Doris Jakobsen taama oqarpoq.
Ilanngullugulu oqaatigaa eqqaamassallugu pingaaruteqartoq, tamatta periarfissaqaratta inuk artorsartoq ikiussallugu, soorlu saaffiginninnikkut, aperinikkut, najuunnikkut tusarnaarnikkulluunniit.
Juliane Henningsenip IA-meersup ukioq manna qulequtaritinneqartup pingaaruteqassusia erseqqissaatigaa, tassalu innuttaaqatigiit ikioqatigiinnermikkut inunnik annaassisinnaanerat.
- Taamaattumik ullumikkut ulloq atorniartigu immitsinnut eqqaasilluta nukittuffigissagipput, immitsinnut paarinissarput inoqaterpullu kinaluunniit ajornartorsiuteqartoq tununneqassanngitsoq, Juliane Henningsen oqarpoq.