Nunarsuaq tamakkerlugu coronavirusimik tunillatsissimasut 27 millioninngortut
Coronavirusimik nunarsuaq tamakkerlugu tunillanneqarsimasut unnuaq 27 millioninngorput. USA-mi ilisimatusarfiup Johns Hopkins Universityp kisitsisaataasa tamanna takutippaa. Ilisimatusarfiup taassuma coronavirusip nunarsuaq tamakkerlugu tuniluunnera nalunaarsuiffigisarpaa.
Coronavirusimik tunillanneqarsimasut ullut sisamat matuma siornatigut 26 millioninngorput.
Johns Hopkins Universitetimit naatsorsuinerit nunani ataasiakkaani peqqinnissamut oqartussaqarfiit tunillatsissimasunik uppernarsaanerat kisimi ilaavoq. Taamaammat tunillatsissimasut amerlanerungaatsiarsinnaapput.
Nunat ataasiakkaat coronavirusimut qanoq misissuitiginersut taassuma saniatigut aamma assigiinngisitaarpoq.
AAMMA ATUARUK Tamaat isigalugu: Coronavirus pillugu killiffik
USA-mi coronavirusimik tunillanneqarsimasut nappaammillu toqquteqarsimasut amerlanerpaapput, Brasilia Indialu tulliullutik.
Coronavirusimik tunillanneqarsimasut amerlanerpaartaat peqqissisarput.
Coronavirus tuniluutilermalli USA-mi tunillanneqarsimasut 6,3 millioninngulerput, Brasiliami Indiamilu tamarmik 4,1 millionit maanna sinnerlugit.
Nunani tassani coronavirusimik toqquteqarsimasut nunarsuarmi amerlanerpaapput, USA-mi 189.000-t, Brasilia 127.000-t Indiamilu 71.000-t.
Inuttaasoqassuseq aallaavigigaanni Perumi, Belgiami Tuluit Nunaannilu coronamik toqquteqartoqarnerpaavoq. Perumi inuit 29.600-it coronavirusimik toqquteqarput. Tamanna inuit 1 millioniugunik 900-it toqquteqartut assigigaa.