"Nunarsuaq tamakkerlugu atuisunut ullorititaasoq" Nunatsinni tallimanngorpat nalliussineqassaaq

"Nunarsuaq tamakkerlugu atuisunut ullorititaasoq" nunarsuaq tamakkerlugu tallimanngorpat nalliussineqassaaq. Kalaallit Nunaannissaaq ulloq taanna malunnartinneqassaaq. Ukiormanna qulequtaritinneqartoq tassaavoq "Atuisunut naapertuilluarneq".
marsip 12-at 2013 13:07

Ullorititaasumut atatillugu Kalaallit Nunaanni Atuisartunut Siunnersuisoqatigiit siulittaasuata nunatsinni atuisut pisinnaatitaaffii immikkut sammivai, ajorisassaanngitsumillu inissisimapput. Siulittaasummi naammagisimaarpai.

-Niuertarfimmut ajornartorsiuteqalersimanermi atuisup piginnaasalinnit arlaannaannullu attuumassuteqanngitsunit siunnersorneqarsinnaanera, pingaarnertut oqaatigineqassaq. Atuisunut Siunnersuisoqatigiit allatseqarfiat Atuisoq, atuisunik oqarasuaatikkut, mailikkut, facebook-ikkut allatigullu ikiuinissamut piareersimajuarpoq. Atuisut saaffiginnittartut ukioq ataaseq qaangiutsinngitsoq pingasoriaatinngorsimanerat ilanngullugu oqaatigineqassaaq, Kalaallit Nunaanni Atuisartunut Siunnersuisoqatigiit siulittaasuat Rigmor Th. Høegh oqarpoq.

Atuisup akuliunnera atuisumut naammaginartumik angusaqarfiussanngikkaluarpat, Atuisunut Maalaaruteqartarfittut Ataatsimiititaliamut ajornanngitsumik akeqanngitsumillu maalaaruteqartoqarsinnaavoq. Taamaammat isumaqartoqarsinnaavoq Kalaallit Nunaanni atuisup, ajornanngeqisumik akeqanngitsumillu inatsisitigut pisinnaatitaaffimminik atuisinnaatitaanera.

- Ulloq manna tikillugu inuussutissarsiutillip atuisup maalaarutaanik tassunga iluaqutaasumik aaqqiissuteqanngitsumik ilisimaneqanngilaq. Taamaattoqarnera naammagisimaarnaqaaq, suliallu Atuisunut Maalaaruteqartarfittut Ataatsimiititaliap allatseqarfiani toqqissisimanartumik ingerlanneqartarnerinut, illuatungeriinnullu suliaq qanoq inerneqaraluarpat, aalajangiinermut paasinnittarnermut ersiutaalluni, Rigmor Th. Høegh oqarpoq.