Nunarsuaq tamakkerlugu arsaannermik unammersuarnerit KNR-ikkut aallakaatinneqassapput
KNR TV-mit nalunaarutigineqarpoq, pissartanngorniulluni unamminerit 64-iusut tamarmik aallakaatinneqarumaartut - tassa ilaatigut KNR1-imi unnukkullu arsaattoqartillugu KNR2-mi takuneqarsinnaassallutik.
- Kalaallit arsaannermik nuannarisaqartut unamminernik 64-inik nuna tamakkerlugu toqqaannartumik isiginnaarsinnaanissaat qulakkeerparput. Unamminerit Danmarkimi DR-imi aamma TV2-mi aallakaatinneqassapput, taakkulu toqqaannartumik aallakaatitaat KNR-imi aallakaatissavavut. Aamma Kalaallit Nunaata nalunaaqutaata Brasiliami nalunaaqutaq ingerlaqatigimmagu, unamminerit ualikkut marluniit unnuk kingusissoq ilanngullugu aallakaatinneqartassapput, tv-mi pisortaq Jan Berg oqarpoq.
Unamminerit tamarmik KNR-TV-kkut toqqaannartumik malinnaaffigineqarsinnaanissaat KNR-imit nuannaarutigaarput, unnukkullu KNR2-kkut aallakaatitsisoqartarneratigut KNR 1-imi aallakaatinneqartartut nalinginnaasut arsaannermik soqutigisaqanngitsunit isiginnaarneqarsinnaajuassapput, Jan Berg erseqqissaavoq.
Nunap arsaannermik aaqqissuisuusup Brasiliap aamma Kroatiap unamminerit ammaanersiorlugit unamminissaat - tullianik sisamanngorpat juunip aqqaneq aappaanni ualikkut sisamanut aallartissaaq, arsaannerpassuillu tassa pissartanngortivinnissap juulip 13-iata tungaanut malinnaavigineqarsinnaassallutik.