Nunarsuaq atominik sakkussiorfiunngitsoq

Nunarsuatta atomimik sakkussiaqarfiunngitsup anguniarnissaanut USA siuttuuniartoq, præsident Barack Obamap ullumi neriorsuutigaa.
Allattoq Elisa Isaksen
apriilip 05-at 2009 16:56

Tamanna pivoq, Tjekkiami illoqarfiit pingaarnersaanni Pragimi inunnut 10.000-ilikkaanut oqalugiartilluni.

- Tamatumunnga peqatigitillugu naalagaaffiit atomip nukinganik sakkussiorsinnaanissaat pinngitsoortittariaqarpoq.

- Nunat atomip nukinganik sakkussiaateqareersut sakkussakillisartariaqarput. Nunallu atomip nukinganik sakkussiaateqanngitsut taamatut sakkussiornissamut periarfissinneqartariaqanngillat. Tamatuma peqatigisaanik nunat sorsunnermut attuumassuteqanngitsumik atomip nukinganik nukissiuuteqarusuttut periarfissinneqassasut, Obama oqarpoq.

Ilanngullugu oqaatigaa, atominik sakkussiornerup annertusarneqannginnissaanik isumaqatigiissut malinneqassasoq, aamma nunat isumaqatigiissummik malinnikkumanngitsut pillarneqarsinnaasariaqartut.

Ilanngullugu oqaatigaa ungasinnerusoq isigalugu nunarsuaq atomip nukinganik sakkussiorfiunngitsoq anguniagaasoq.

- Nunarsuaq atomip nukinganik sakkussiaateqanngitsoq, uanga suli inuutillunga immaqa angujuminaassinnaavoq, taamaattorli tamanna siunnerfigalugu sulisariaqarpugut, Obama oqarpoq.