Nunarput WTO-mut ilaasortaanngimmat Danmark eqqartuussisulersuussisariaqarumaarpoq
Kalaallilli Nunaat WTO-mut ilaasortaanngimmat Danmark Nunarput sinnerlugu eqqartuussisulersuussisariaqassaaq, Danmarkilu EU-mut ilaasortaagami imminut eqqartuussisulersuutissaaq.
Naak naggueqatigiit Inuit siunnersuummi ilaatinneqanngikkaluartut, siunnersuut nunat tamalaat niueqatigiissinnaanerannut eqquinerlussasoq naalakkersuisut isumaqarput, EU-llu eqqartuussisulersuunneqarnissaa siunnerfigalugu.
Kalaallili Nunaat WTO-mut ilaasortaanngimmat Danmark Nunarput sinnerlugu EU-mik eqqartuussisulersuussisariaqassaaq, taamalu imminut eqqartuutissalluni. Danmarkip nunanut allanut ministereqarfiani atorfilittat Radioaviisimut taama oqarput.
Eqqartuussisulersuussisoqassanersorli Kalaallit Nunaanniit suli politikkikkut aalajangiutivinneqanngitsoq, atorfilittap oqaatigaa:
- Eqqartuussisulersuussisoqassanersoq naalakkersuisut aalajangissappassuk qanoq iliuuseqarnissaq taamanikkussamut takujumaarparput. Danmarkip Kalaallit Nunaat sinnerlugu eqqartussisulersuussinissaa kimit aalajangerneqassanersoq nalulluinnarpara, siornatigummi taamaaliortoqarnikuunngimmat, nunanut allanut ministereqarfimmi atorfilittaq oqarpoq.
Puisit amiinik sanalukkanillu puisinit nunani EU-mut ilaasortaasuni avammut nioqquteqartarnerup inerteqqutalernissaa KNAPK-miit aamma akerlilerneqarpoq, Inuttut Pisinnaatitaaffiit unioqqutinneqarnerat nunarsuarmilu niuernermut nunat tamalaat suleqatigiiffiata WTO-p maleruagassaasa unioqqutinneqarnerat oqaatigineqarluni:
- KNAPK isumaqarpoq nunatsinni naalakkersuinermik suliaqartut pisortallu EU-mut saaffiginnissuteqartariaqartut EU-p piniartunut aningaasanik taarsiissuteqarnissaa piumasaralugu, KNAPK allappoq.
- Puisit amiinik eqqusseqqusiunnaarneq WTO-p malittarisassaanik unioqqutitsinerussaaq, inuunermi atukkat pitsaanerulersinneqarnissaannik akissarsiallu naleqassusiisa qaffassarneqarnissaannut WTO-p anguniagai matumani eqqarsaatigisariaqarlutik, suliffissaqartitsiniarnerlu matumani aamma eqqarsaatigisariaqarluni, soorlu aamma nunat Kalaallit Nunaattut ittut nunat tamalaat akornanni niueqatigiinnermut peqataanerulersinneqarnissaannut WTO-p anguniagai aamma puigorneqassanngitsut, KNAPK allappoq.
Sulisitsisut peqatigiiffiat GA oqaaseqartinniaraluaratsigu iluatsinngilarput.
