Nunarput utoqqatsissava? Aap, Aaja Chemnitz Larsen oqarpoq

ICC-p siulittaasorisimasaata Namminersorlutik Oqartussat aamma utoqqatsertariaqarsorai. Kim Kielsen akissuteqanngilaq.
Naalakkersuisut nunarput sinnerlugu utoqqatsissuteqartariaqarput, Folketingimut ilaasortaq, Inuit Ataqatigiinneersoq Aaja Chemnitz Larsen oqarpoq. Assi © : Maalia Lynge Christiansen
decembarip 11-at 2020 14:22
Nutserisoq Connie Fontain

Meeqqanut misileraataasumik Danmarkimut 1951-imi aallartinneqarsimasunut 22-nut tunngatillugu suliaq marlunngornermi inernilerneqarallarpoq. Tassami ministeriuneq Mette Frederiksen meeqqanit taakkunannga suli uumasortaasunut arfinilinnut pisortatigoortumik utoqqatsissuteqarpoq.

Tamatuma saniatigut suliamut atatillugu nalunaajaaneq kalaallit danskillu oqartussaasuisa suleqatigiillutik suliarisaat saqqummiunneqarpoq.

AAMMA ATUARUK Udredning: Eksperimentet var ude af kontrol og gav dybe, menneskelige sår

Suliamulli naggasiineq kikkunnit tamanit isumaqatigineqanngilaq. Taakkumi naggat uniffittut isigerusunneruaat.

- Kalaallit Nunaata suleqatigisani naligalugu akisussaaffimmik tiguseqataanissaa takorusuppara. Naalakkersuisut nunarput sinnerlugu utoqqatsissuteqartariaqarput, Folketingimut ilaasortaq, Inuit Ataqatigiinneersoq Aaja Chemnitz Larsen oqarpoq.

- Kalaallit Nunaata misileraasoqarnera taperseramiuk nunarput akisussaaqataavoq. Maanna politikerit taamani politikeriunngikkaluarput, taamaakkaluartorli akisussaaffeqarput.

Landsrådit isumaqataasut

Nalunaarusiami allaqqavoq, taamanikkut landsrådimut ilaasortanit 23- usuni 19-it, 1950-imi meeqqanik isigaanissamut isumassarsiaq taperserneqarpoq.

Landsrådit naalagaaffimmi aalajangiisinnaatitaanngillat, taamaallaalli siunnersuisinnaatitaapput, taamaammat meeqqat misiligaatigineqartussanut tunngatillugu aalajangerneq Københavnimi aalajangerneqarpoq.

Oqartussalli landsrådinit taperserneqarmata politikikkut oqartussat taamatut aalajangerput.

AAMMA ATUARUK Aqqaluk Lynge: Meeraanerminni misileraataasut taarsiiffigineqartariaqarput

Nunarput meeqqanut misileraataasimasunut suli inuusortaannut utoqqatsissuteqartariaqartoq, Aqqaluk Lynge aamma isumaqarpoq.

Taanna ICC-mi siulittaasuusimavoq ICC-milu ukiuni 38-ni sulisimalluni.

- Landsrådit akisussaaqataapput. Taakku oqartussaapput, akisussaaqataallutillu.

- Eqqaamasariaqarparput uani nunasiaqartuusununa pissaanertik atorlugu taamaaliorsimasut. Aammalu pissaaneqarfigaat landsrådit imaluunniit nunatsinni taamanikkut nunasiaanerup ataani qinikkat, Aqqaluk Lynge oqarpoq.

Inatsisartut suliamik misissuisariaqalersut taanna isumaqarpoq.

- Inatsisartut suliamik matumanik misissuinissaat piffissanngorpoq.

- Assersuutigalugu ministeriuneq Naalakkersuisut siulittaasuanut ataatsimiigiarnissamut qaaqquneqarsinnaavoq.

Kim Kielsen nipaatsoq

KNR-ip Kim Kielsen Naalakkersuisunut siulittaasuusoq nunarput meeqqanut misileraataasimasunut utoqqatsertariaqarnersoq akissuteqartinniaraluarpaa.

Tamanna akissuteqarfiginngilaa. Taassumali isumaginninnermut naalakkersuisoq, Martha Abelsen (S) innersuutigaa. Taassumalu nassuiaatip Inatsisartuni oqallisigineqalinnginnerani kalaallisuumut nutserneqaqqaassasoq oqaatigaa.

AAMMA ATUARUK Nunarput utoqqatsissava? Martha Abelsen akerliuvoq

- Isumaqataanngilluinnarpunga. Mette Frederiksenip Kim Kielsenillu – imaluunniit Naalakkersuisuni ukiuni nutaami siulittaasuusup – ataatsimut oqaluttuarisaanitsinnit pisimasut allat aaqqiiffigineqartariaqarnersut oqalligisariaqaraat isumaqarpunga, Aaja Chemnitz Larsen oqarpoq.

- Nunatsinnit utoqqatsertoqanngikkuni tamanna ima isumaqassaaq nunarput akuunngitsoq utoqqatsernerlu danskit kisimik aalajangigarigaat. Taamaattoqanngilarlu.