Nunarput USA-miit isigalugu

novembarip 19-at 2006 13:10

Amerikamiut nunarput pillugu ilisimasakitsuararsuupput, nunarpullu takornariarfissaqqissutut isigigajuttanngilaat.

Nunarpulli tikeraareeraangamikku nuannarisaqaat allanullu unnersiutigisarlugu.

Taamatut naatsukullammik eqikkarlugu oqaatigisinnaavarput aatsaat siullerpaamik ilisimatusarnikkut misissorlugu Amerikamiut nunatsinnut tunngasunik ilisimasaqarnerinut tunngasumik allaaserisaqartoqarsimanera, allaaserisaq taanna aamma nunatsinni ineriartorfissaasinnaasunik periarfissanik tikkuussisuuvoq.

Misissuineq taanna ”Grønlands image i USA”-mik qulequtserneqarsimavoq, kalaallisuunngorlugu ”Kalaallit Nunaata USA-miit isigineqarnera”-nik nutserneqarsinnaagunartoq. Ilisimatusarnikkut misissuineq taanna danskimit arnamit Stine Dudda-mit suliarineqarsimavoq, suliaminillu illersuinermini 13-imik angusisimalluni. Taamaalillunilu Stine Dudda handelshøjskolemi universitetip qaffasissusaanut nallersuunneqarsinnaasumik soraarummeernermini aningaasarsiornermut tunngasumik ilinniarnermini angusaqarluarluni.

Taassuma apeqqutit immersugassat Amerikamiunut 1000-inut akisassanngortissimavai, taakkulu Amerikamiut nunatsinnut tunngasumik annermik silaannaap allanngoriartornera pillugu tusagassiutini tusartakkatik kisiisa ilisimasaqarfigisimavaat.

Akissutigineqartullu naapertorlugit nunarput tusarsaanngilluinnartutut taakkartorneqarsimavoq aammattaaq angalatitsiveqarfiusuni ilisimaneqarpiarsimanani. Akissutinilu nunarput qiianartutut sikuinnangajaalluni qaqortuinnartut nunarsuullu assingani mattusimasutut isigineqarsimavoq.

Amerikamiulli nunatsinniissimasut inuit inussiarnernerartarsimavaat nunaqarfinnilu illut qalipaatigissaarnerarlugit nunarsuarlu kusanartoq unnersiutigisarsimavaat.

Stine Duddap tikkuarpaattaaq nunatsinni takornariaqarnermi inuussutissarsiornermilu siunnersortit nunarput USA-mut nittarsaatissallugu annertuumik suliassaqarnerat, minnerunngitsumik aasaru Kangerlussuarmiit Baltimore-mut aqqut ammaanneqarnerata kingorna.

Taamatuttaaq taassuma erseqqissarpaa, nunarput pillugu USA-mi inuit ilisimasaat annikingaarmata allaat aviisitigulluunniit pilerisaarutaasartut kimeqarnaviaratik.