Nunarput ukiut 100-t qaangiuppata: Præsidentimut qinerseqqaarneq

Nunatsinni Naalakkersuisunut qinersinani præsidentimut qinerseqqaarneq. Tassa nunatsinni inuusuttut nunarput ukiut 100-t qaangiuppata qanoq isikkoqalersimassanersoq takorluugaasa ilaat.
Naja Fleischerip præsidentimut qinersineq tusarnaagassialiaraa. Assi © : Naja Fleischer
Nuummi GUX-imi 2.g-mi ilinniartup, Ivaana Ludvigsenip nunarput disneyland-eqartoq takorloorpaa. Assi © : Ivaana Ludvigsen
Allattoq Marie Kûitse Kristensen, Signe Haahr Pedersen
juulip 04-at 2021 11:21

Nunatta Katersugaavisia Allagaateqarfiatalu nunatsinni inuusuttut ukiut 100-t qaangiuppata nunatta qanoq inissisimanissaanik takorluuisillugit unammisippai.

Unammisitsineq Augo Lyngep 1931-imi siunissamut takorluuilluni oqaluttualiaani ukiut 300-nngornerat, aallaavigalugu inuusuttut ukiunut 100-nut takorluuisinneqarput. 

Unammisunilu normu 3-nngortut Nuummi GUX-imi ilinniartuupput.

Præsidentinngorniuuttut

Taakku ukiut 100-t qaangiuppata nunatsinni naalakkersuisunut qinersissaarluta præsidentimut qinersisalersimanissarput podcastiliaraat.

- Uagut takorloorparput Kalaallit Nunaat namminiilivissimasoq præsidenteqalersimallunilu. Taava tassani præsidentiut qineqqusaartut inuttaritippagut, Nunatta Katersugaavisia Allagaateqarfiatalu unammisitsinerani normu 3-nngortut ilaat, Naja Fleischer taama oqarpoq.

Nunatsinni oqaatsivut atorunnaarsimassagipput tuluttullu oqaaseqalersimanissarput taassuma oqaluttuaraa. Tusagassiuutitigut pisiniarfinnilu allagartat tamarmik tuluttut allaqqallutillu ingerlanneqalersimammata, kalaallit oqaatsivut qatorunnaarsimagigu Naja Fleischerip Nuummi GUX-imi atuaqataasalu ukiut 100-t qaangiuppata takorluugaraat.

Taamaakkaluartoq nunatsinni oqaatsivut kulturerpullu siunissami aallunneqalersimassasut taakku kissaateqarput.

- Kissaatigivarput kalaallisut oqaatsit atorluarneqarnerussasut. Kalaallillu kulturiat tammaatsaaliorneqassasoq.

Siorarsiorfik metrollu

Takorluukkalli taakkuinnaanngillat, normu 2-nngortoq, Attuminngaaneersoq Ivaana Ludvigsen ukiut 100-t qaangiuppata takorluugai aamma siuarsimangaatsiarput. Taannami Siorarsiorfimmi najugaqalersimalluni metrorluni mittarfissualiarsinnaalersimanissani takorloorpaa.

Takorluukkalli taakkuinnaanngillat:

- Ukioq 2121-imi takorloorparput Nuuk siorarsiorfeqarsimalerlunilu, metroqalersimasoq taavalu disneylandeqarluni, Nuummi GUX-imi 2.g-mi ilinniartoq Ivaana Ludvigsen oqarpoq. Taassuma atuaqatini Carla Nielsen podcastilioqatigaa.

Aamma atuaruk