- Nuanneqaaq, 25-nik ukiulik, timmisartortartunngorlaaq, Benjamin Krarup Hammeken oqarpoq.Assi: PRIVAT FOTO

Nunarput timmisartortartunik pingasunik pisuunnguallattoq: Meeraanermi takorluugaq piviusunngortoq

Kalaallit timmisartortartut pingasut ilinniakkaminnik sapaatip-akunnerata siuliani naammassinnipput. Ilinniagaq sukangallunilu sakkortusoq, naammassisup ataatsip oqaatigaa.

- Nuanneqaaq, 25-nik ukiulik, timmisartortartunngorlaaq, Benjamin Krarup Hammeken oqarpoq.

Timmisartartortut nutaat pingasut Center Air Pilot Academymi ukiuni marlunni ilinniareerlutik februaarip ulluisa 20-anni ilinniakkaminnut uppernarsaateqalerput.

Isak Chemnitz Frederiksenip timmisartortartutut allagartartaarnernini aamma nuannaarutigeqaa:

- Ukiut marlungajaat taamannak sulerujussuarneq tassa naavoq, imaluunniit iluamik aallartilerpoq, 22-nik ukiulik, Isak Chemnitz Frederiksen oqarpoq.

Isak Chemnitz Frederiksenip timmisartortartunngornissani takorluugariuaannarsimavaa. Nammineq assiutigisaq.

Nukappiaraallunili takorluugaq

Taassuma timmisartortartunngornissani nukappiaraallunili takorluugarilersimavaa:

- Mikisuullunga ferieraangatta ilaatigut timmisartukkut angalagaangatta nuannarisorujussuuara motorit isigalugit aallartittut. Taavalu aamma meeqqerivimmi eqqaamallugu soorlu silamiikkaangatta qummut qiviarluni dash 7-ip qulaakkaatigut, Isak Chemnitz Frederiksen oqarpoq.

Taakku ilinniarnerminni kisimiillutik timmisartornissami siornatigut quleriarlutik ilaqarlutik timmisartoreersimapput:

- Nuannersorujussuuvoq. Nuannaajallannaqaaq, aallaqqaammut pissangangaatsiariarluni kisianni siullermeeraanni nuannersorujussuuvoq, suna tamaat sapernagu misigisimanarluni, Benjamin Krarup Hammeken Københavnip Universitetsiani biokemimi ilinniaqqaarsimagaluartoq oqarpoq.

"Piareerputit"

Kisimiilluni timmisartorneq Isak Chemnitz Frederiksenip immikkorluinnaq aamma misigaa:

- Kisimiillunga mikkiartorlunga sanimut qiviaraluarama kisimiivillunga kisimiippunga. Eqqarsarlunga tassa massakkut utoqqatsissuteqanngilaq kisimiippunga, nammineq anguara, Isak Chemnitz Frederiksen oqarpoq.

Benjamin Krarup Hammekenip ilinniakkamik naammassinini tulluusimaarutigaa:

- Ilinniaqatikkalu naammassisaqarnitsinnut imminut tulluusimaarutigeqaanga. Ilinniakkatsinnik naammassisaqarnerput taama angusaqarluartiginerput tulliimaarutigeqaara. Naammassisaqarnermi misigisaq pikkunaqaaq, tamannalu angeqaaq, ilaquttat pilluaqqusiartorlutik aamma maaniipput. Misigissuseq nuanneqaaq,  Benjamin Krarup Hammeken oqarpoq.

Timmisartortartunngorlaat pingasut Suluk Lyberth, Benjamin Hammeken Krarup aamma Isak Chemnitz Frederiksen Air Greenlandimi piffissami sivikitsumi atorfinitsinneqarnissamut neqeroorfigineqarput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat