Nunarput tapersersorniarpaat
Puisit amii europami tuniniagaasarnerat EU-mi ilaasortanit inerteqqutinngortinniarsarineqarnera, EU-milu ilaasortat akornanni amerlanerussuteqartut isumaqataallutik atsioqataasimanerat, akerlianut saatinniarlugu Danmarkimi inatsinik atuutsitsinermut ministeri Lene Espersen aallaqqaammut puisit amiisa tuniniarneqartarnerinik isumaa EU-mi ilaasortat amerlanerussuteqartut assinganik isumaqarsimagaluartoq, isummani allanngortippaa. Aalisarnermut naalakkersuisoq Finn Karlsen ministerimik ullumi ataatsimeeqateqarsimasoq ima oqarpoq.
- 2005-it aallartilaartoq, uagutsinnut akerliusorujussuarmik oqaaseqarnikuugaluarpoq. Kisianni ataatsimeeqatiginerani paasinarsivoq Danskit naalakkersuisui uagutsinnut tapersersuisuusut, assinganik maannakkut isumaqartoq. Qularnanngilaq naalakkersuisut akornanni tamanna oqaloqatigiissutigineqarsimassasoq. Lene Espersen-ip sapinngisani tamaqqinnaaviat kalaallit nunaanni puisit amiinik tunisassiortarnerup eqqornerlunneqannginnissaa sulissutiginiarpaa. Tassa qallunaat naalakkersuisui suna tamaat tikillugu uagutsinnut tapersersuiniarput. Finn Karlsen naggasiilluni taama oqarpoq.
