Nunarput suli OL-imut ilaaqqusaanngilaq
Nunarsuarmiut timersornikkut unammiuaarnerini OL-imi kalaallit erfalasuata amuneqartalernissaanik oqallinneq suli naammassinngilaq.
Danskit kulturministeriata Brian Mikkelsenip nunat tamalaat olympiadertarneq pillugu ataatsimiititaliaat ullumi iluatsippianngitsumik ataatsimeeqatigaa. Lars-Emil Johansenili tunniutiinnarnianngilaq.
Taanna suliaq tamaanga killeqarsoralugu aperaarput.
- Naagga naammasseqqajanngilaq maannakkut tassa olympiadep nunarsuaq tamakkerlugu siulersuisuisa siulittaasuat Jacques Rogge ataatsimeeqatiginerani nalunaarsimavoq Kalaallit Nunaat maannakkutut inissisimatilluni ilaasortanngorsinnaanngitsoq. Tassa imaappoq naalakkersuinikkut Kalaallit Nunaata nammineersinnaassusia maannakkutut killeqartigitillugu taava olympiade-mut ilaasinnaanngitsugut. Taamaattumik isumaqarpunga taanna suliassaq tulleq unaasariaqartoq; Danmarkimi Kalaallit Nunaannilu naalakkersuisut isumaqatigiimmata Kalaallit Nunaat nammineerluni olympiade-mut ilaasinnaalertariaqartoq, taava maannakkullu namminersorneq pillugu ataatsimiititaliarsuaq qallunaanik kalaallinillu ilaasortalik sulilluni aallarteruttormat, taava isumagisariaqarparput allannguinissaq tulleq ima Kalaallit Nunaannut namminersortunngortitsitigissasoq aamma FN-iminngaanniit isigalugu allaat siunissami olympiademi ilaasalernissarput nammineerluta taanna aqqutigaluguttaaq periarfissinneqarsinnaassalluni, Lars-Emil Johansen oqarpoq.
Taanna aperaarput, Savalimmiut taputartuunneqarmat tassunga tunngatillugu angusaqartoqarsimanersoq.
- Savalimmiut paasisakka najoqqutaralugit Savalimmiuni timersoqatigiit nammineerlutik perusussimapput Kalaallit Nunaannullu attuumassuteqarusunnatik, taanna ajuusaarnaraluarpoq paasiuminaallunilu, kisianni tassa ataqqivara Savalimmiormiut namminneq kisimiillutik suliassamik taassuminnga ingerlatserusupput taamaaliorusukkunik taamaaliorniarlik. Uagut kalaallit ataatsimoorluta suliassaq taanna ingerlattariaqarparput, taava aamma neriuutigeqaara timersornermik suliallit, timersoqatigiiffiit kattuffiisa aamma taassuminnga naalakkersuinikkullu sulisut aamma suleqatigiinnerat ingerlaqqissasoq, Lars-Emil Johansen oqarpoq.
Nunarput Savalimmiullu akuerineqassappata ikinnerpaamik nunat 25-t qinnuteqarnissaat IOC-imi præsidentip ilimagaa.
Danskit naalakkersuisuisa nunarput Savalimmiullu tapersersorluinnarai kulturministerip Brian Mikkelsenip erseqqissaatigaa.
IOC-imi præsidentip Brian Mikkelsen ataatsimeeqatigereerlugu nunatta Savalimmiullu sinniisuutitaanik ataatsimeeqateqarnissani kissaatigaa.
