Nunarput Special Olympics Idrætsfestivalimi siullermeerluni peqataatitsilerpoq

Special Olympics Idrætsfestival Danmarkimi timersornermik ineriartornikkut innarluutilinnut aaqqissuussani annerpaavoq. Timersornermik sammisaqarluni ukioq manna maajip 29-anniit 31-annut katerisimaarfiussaaq, tassanilu Nunatsinneersut 21-t unammeqataassapput.

Unammisussat Paamiuniit, Ilulissaniit, Kangerlussuarmiit Sisimiuniillu Nuummiit Danmarkimut sisamanngornermi aallarput.

Qeqqata Kommuniani timersoqatigiillu kattuffianni ineriartornikkut innarluutilinnut timersortarnerannik suliniummi siunnersorti Ivigannguaq Lyberth Josefsen, Roskildemi unammeqataasut ilagalugit angalasussaq, aamma qilanaarpoq.

Unammeqataassussat ulloq unnuarlu innarluutilinnut angerlarsimaffianneersuupput, unamminissaminnullu sungiusarluarsimasut Ivigannguaq Lyberth Josefsenip oqaatigaa.

-Sisimiuni sapaatit akunnerannut timersortussaqartarput tassani sungiusarsinnaallutik, Ilulissaneersut Paamiuninngaanneersullu namminneerlutik sungiusarlutik ingerlasarnikuullutik.

Unammisussat timersuutini aqqaneq marlunni unammisaqattaassapput, ilaatigut badmintonimi, bowlingimi arsaannermilu.

Nuannisarnissaq pingaarnerusoq

Special Olympics timersornermik katerisimaarfik inunnut 16-it sinnerlugit ukiulinnut ukioq allortarlugu unammisitsisarpoq. Tassani unammisut timersornikkut qanoq piginnaasaqarnerat apeqqutaatinnagu aaqqissuussaavoq.

Unammiaqataasullu nuannisarnissaat Ivigannguaq Lyberth Josefsenip neriuutigaa.

-Una pingaarnerpaagami ilaasut nuannisarnissaat. Uani idrætsfestivaalimi pingaartittaramikku, ajugaanissaq pivallaanngikkaluarlugu kisianni nuannisarnissaat. Taakkua ilaasut inuinnartut misigisartagaat unammersuaarnermi nuannisaarneq.

Peqataasut Islandimiit, Norgemiit, Sverigemiit, Finlandimiit, Danmarkimiit, Savalimmiuniit Nunatsinniillu aggerfeqarput.

Timersornermik katerisimaarneq timersorneriinnaanani ullut pingasut iluanni nipilersornermik ataatsimoornermillu imaqarnissaa aamma pilersaarutaavoq.